Замест ялавічыны па-бургундску на Алімпіядзе будзе веганская ежа — #ІхНоравы

23/07/2024 - 13:03

#ІхНоравы / Euroradio

Дэмакраты, хутчэй за ўсё, падтрымаюць Камалу Харыс, і яна прадставіць партыю на выбарах гэтай восенню. Усё канчаткова вырашыцца ў жніўні на з'ездзе Дэмакратычнай партыі.

Да гэтага моманту беларусам можна трохі адцягнуцца ад амерыканскіх выбараў і пераключыць увагу на іншыя падзеі ў свеце. Мы ўжо выбралі для вас самыя цікавыя.

Экалімпійскія гульні

Парыж абяцае правесці самыя экалагічныя Алімпійскія гульні ў гісторыі, піша ВВС. Аргкамітэт кажа, што французская Алімпіяда пакіне ўдвая меншы вугляродны след, чым гульні ў Лондане і Рыа. Чаму?

Па-першае, Францыя амаль не будавала новых стадыёнаў для гульняў. Перад лонданскай Алімпіядай пабудавалі 6 новых стадыёнаў, у Рыа наогул узвялі 10 пастаянных пляцовак і 7 часовых. А французы задзейнічалі старыя стадыёны і дадалі толькі дзве пляцоўкі — водны цэнтр і арэну для бадмінтона і мастацкай гімнастыкі. І нават гэта зрабілі экалагічна: напрыклад, сядзенні вырабленыя з перапрацаванага пластыку.

Столікі ў зоне, дзе будуць тусавацца спартоўцы, вырабленыя з перапрацаваных валанчыкаў, пуфы — з парашутнага палатна, а крэслы — з перапрацаваных накрывак ад бутэлек.

А яшчэ арганізатары зробяць упор на веганскую ежу. Для французаў, вялікіх аматараў ялавічыны па-бургундску і стэйка па-татарску, гэта вялікі крок. Дарэчы, каб скараціць транспартныя выдаткі, большую частку інгрэдыентаў будуць закупляць у мясцовых сельгасвытворцаў.

А яшчэ ўсе алімпійскія аб'екты будуць звязаныя сеткай веладарожак.

У нас для вас ёсць трошкі сімвалізму: Алімпіяда праходзіць у тым самым горадзе, дзе амаль 10 гадоў таму сусветныя лідары сабраліся, каб узяць на сябе абавязанні па захаванні клімату. Гаворка пра тое самае Парыжскае пагадненне, з якога Трамп у свой прэзідэнцкі тэрмін гучна вывеў ЗША.

Усё гарыць. Зноў

Але гэта пакуль адзіная добрая навіна пра клімат. У першай палове лета ўсё паўночнае паўшар'е гарэла. Служба маніторынгу атмасферы "Капернік" зафіксавала маштабныя лясныя пажары ў Канадзе, на Алясцы і на ўсходзе Расіі.

Усё гэта прывяло да росту выкідаў вугляроду, а дым ад пажараў пераляцеў праз Паўночны Ледавіты акіян і дасягнуў нават Арктыкі, піша Guardian.

Навукоўцы кажуць, што ў апошнія гады сезон пажараў падоўжыўся — цяпер ён пачынаецца раней. Але вялікая бяда яшчэ і ў тым, што інтэнсіўнасць лясных пажараў становіцца беспрэцэдэнтнай.

Усё гэта можа прывесці да праблем са здароўем.

"У кароткатэрміновай перспектыве найбольш відавочныя ўскладненні ўзнікаюць з боку дыхальнай сістэмы, гэта асабліва небяспечна для людзей з такімі спадарожнымі захворваннямі, як астма, захворванні сэрца і лёгкіх", — кажа навуковы супрацоўнік Інстытута глабальнага аховы здароўя Універсітэцкага каледжа Лондана, доктар Марына Раманела.

Пры гэтым ніякія рэкорды гэты год не б'е, дадаюць навукоўцы. І мы трапляем у пастку: сітуацыя з пажарамі вельмі дрэнная ўжо шмат гадоў запар, і нас гэта больш не палохае.

У слабавідушчых дзяцей з'явілася свая Барбі

Яшчэ адзін крок да інклюзіі: кампанія Mattel выпусціла першую невідушчая ляльку Барбі, піша Guardian.

"Мы ўсведамляем, што Барбі — гэта значна больш, чым проста лялька. Яна ўвасабляе самавыяўленне і можа стварыць пачуццё прыналежнасці", — кажуць у кампаніі.

Barbie

mattel announces "blind barbie" pic.twitter.com/POHxlUSM51
— funky eskimo (@lorenzoarreola) July 23, 2024

Лялька трымае ў руках бел-чырвоны кій з булавешкай у выглядзе зефіркі, а яе позірк скіраваны трохі ўверх. Каб не памыліцца з дызайнам, кампанія супрацоўнічала з Амерыканскім фондам сляпых. Так стваральнікі Барбі спрабавалі дабіцца таго, каб усё, ад вачэй лялькі да яе адзення, дакладна рэпрэзентавала невідушчых ці слабавідушчых людзей.

Лялька апранутая ў атласную ружовую футболку і фіялетавую спадніцу з цюлю. У спадніцы эластычны пояс, а футболка зашпіляецца на пяцельку — такі дызайн выбралі, каб невідушчым дзецям было зручней апранаць Барбі. На скрынцы з лялькай слова Barbie напісанае шрыфтам Брайля.

Маёрка ад вас стамілася

Тысячы актывістаў выйшлі пратэставаць супраць полчышчаў турыстаў у іспанскім горадзе Пальма-дэ-Маёрка, піша Reuters. На іх плакатах было напісана: "Не масаваму турызму" і "Спыніце прыватныя самалёты".

Актывісты ўжо пратэставалі ў Барселоне, Малазе і на Канарскіх астравах. Ім не падабаецца, што праз турыстаў растуць цэны на жыллё, а мясцовыя не могуць сабе дазволіць жыць у цэнтры ўласнага горада. А яшчэ турысты займаюць усе пляжы.
Дарэчы, акцыю падтрымалі нават некаторыя турысты (але большасць трошкі збянтэжылася).

"Мы хочам скараціць масавы турызм і забараніць нерэзідэнтам купляць дамы, якія выкарыстоўваюцца толькі некалькі месяцаў у годзе", — тлумачылі сваю пазіцыю пратэстоўцы.

Калі вас кранулі пратэсты жыхароў Маёркі, пачытайце, чым заняцца ў Беларусі летам.