Жлобінскі БМЗ зноў не змог аспрэчыць санкцыі ЕС у судзе

Агульны суд Еўрасаюза адхіліў пазоў Беларускага металургічнага завода са Жлобіна аб зняцці санкцый ЕС. Рашэнне з'явілася на сайце суда.

БМЗ трапіў пад санкцыі як прадпрыемства, цесна звязанае з рэжымам Лукашэнкі. Таксама пры ўнясенні завода ў "чорны спіс" улічваліся рэпрэсіі ў Беларусі і падтрымка шырокамаштабнай расійскай агрэсіі супраць Украіны .

У судзе прадстаўнікі БМЗ сцвярджалі, што завод не мае дачынення да дзеянняў беларускіх уладаў, фінансава не падтрымлівае рэжым Лукашэнкі і дзейнічае як камерцыйнае прадпрыемства, арыентаванае на экспарт.

Суд, аднак, вырашыў, што санкцыі былі ўведзеныя абгрунтавана. БМЗ атрымлівае выгады ад рэжыму Лукашэнкі, структурна залежыць ад дзяржаўнага апарату і робіць унёсак ва ўстойлівасць рэжыму. Прадпрыемства было прызнанае інструментам дзяржаўнай эканамічнай палітыкі, які адыгрывае ключавую ролю ў экспартнай мадэлі эканомікі Беларусі. Суд адзначыў, што БМЗ атрымлівае дзяржаўныя льготы і падтрымку, якія дазваляюць яму канкураваць на міжнародным рынку, тым самым умацоўваючы эканамічныя пазіцыі рэжыму.

У выніку пазоў БМЗ быў адхілены ў поўным аб'ёме. Гэта ўжо другая безвыніковая спроба БМЗ скасаваць санкцыі ЕС.