Жыхара Полацка выкралі і забілі з помсты за абразу жанчыны
Жыхара Полацка выкралі і забілі з помсты за абразу жанчыны. Упраўленне Следчага камітэта па Віцебскай вобласці завяршыла расследаванне крымінальнай справы, яе накіравалі ў суд.
Трагічнае здарэнне адбылося ў траўні мінулага года, калі знік 29-гадовы жыхар Полацка. У міліцыю звярнулася яго маці. Высветлілася, што напярэдадні ўвечары невядомыя з выкарыстаннем гвалту скралі мужчыну, звезлі яго ў багажніку аўтамабіля. Неўзабаве былі затрыманыя падазраваныя ў здзяйсненні злачынства, мужчыны ва ўзросце 25 і 31 гадоў, мясцовыя жыхары. Яшчэ двое зламыснікаў (ва ўзросце 26 і 39 гадоў) уцяклі, іх затрымалі пазней.
Як стала вядома, скрадзенага мужчыну вывезлі ў бязлюднае месца і забілі бейсбольнай бітай. Цела закапалі на беразе аднаго з азёр у Полацкім раёне, а біту выкінулі. Высветлілася, што злачынства было здзейсненае з помсты за абразу забітым жонкі аднаго з затрыманых.
Як паведамляе прэс-служба Следчага камітэта, крымінальныя справы былі распачатыя па артыкулах "выкраданне чалавека, здзейсненае групай асоб па папярэдняй змове, з ужываннем гвалту, небяспечнага для жыцця і здароўя" (п.п. 6 і 7 ч. 2 арт.182) і "забойства, спалучанае з выкраданнем чалавека, здзейсненае з асаблівай жорсткасцю, здзейсненае групай асоб" (п.п. 4, 6 і 15 ч. 2, арт.139 КК).
