Беларусам адмяняюць запісы на нямецкую візу пасля года чакання

Беларусам, якія год таму запісаліся на падачу нямецкай візы, нечакана сталі прыходзіць паведамленні пра адмену запісу.

Такое паведамленне атрымала, напрыклад, мінчанка Алёна, якая запісалася на падачу візы ў траўні 2024-га. Нядаўна яна атрымала свабодны слот на красавік 2025-га. Але за месяц да прызначанай даты беларусцы прыйшоў ліст аб адмене запісу, піша "Анлайнер".

Дзяўчына двойчы пісала ў візавы аддзел амбасады з гэтай нагоды. Аднак кожны раз ёй прыходзіў стандартны адказ, што перанос запісу немагчымы.

Адміністратар чата запісу на нямецкія візы Аляксей у гутарцы з журналістамі пацвердзіў, што за апошні тыдзень такія выпадкі адбываліся больш за дзесяць разоў. На яго думку, здарыўся збой у сістэме запісу.

"У кагосьці адмяняюцца ўжо прызначаныя даты, камусьці проста не прыходзіць ліст з iм. А калі няма ліста, дык і пацвердзіць запіс немагчыма. Даказаць амбасадзе, што запіс сапраўды быў пацверджаны, можна хіба што толькі скрыншотам старонкі з пацвярджэннем. Але гэта таксама толькі здагадка: пакуль што ў чаце не адзначыліся людзі, у якіх на момант адмены меўся такі скрыншот", — кажа адмін чата.