“Час пакажа”: як жывуць сэканды ў Беларусі пад новымі санкцыямі

09/10/2024 - 14:37

Сэканд-хэнд у Мінску / Onliner.by

— Я ведаю толькі, што мы не зачыняемся, мы працуем у звычайным рэжыме. [...] Кошты трошку выраслі, вы павінны былі заўважыць, — расказала Еўрарадыё прадавец у мінскай краме сэканд-хэнд.

З 1 кастрычніка пачала дзейнічаць забарона на ўвоз адзення сэканд-хэнд з ЕС у Беларусь. Пасля гэтага здавалася, што беларускія крамы ўжыванай вопраткі сутыкнуцца з сур'ёзным выклікам, бо Еўрасаюз быў іх асноўным пастаўшчыком.

Чытачка Еўрарадыё была ў сталічным сэкандзе і расказала, што адзежы вельмі шмат, каб знайсці нешта файнае — “трэба парыцца”. Цэны розныя: майкі ад 5 да 25 рублёў. Могуць сустрэцца амаль як новыя скураныя боты за 125 рублёў. Старамодныя будуць каля 35-40 рублёў. Поўнае абнаўленне — раз на месяц. Менавіта ў гэтай краме рэчаў заўсёды бітком.

“Час пакажа”: як жывуць сэканды ў Беларусі пад новымі санкцыямі

Адзенне ў мінскім сэкандзе

Яна ж распавяла, што ў іншай краме наогул можна яшчэ знайсці майкі і па рублю, і па два. Але туды трэба прыходзіць на завоз, бо адзенне таннае, але ў кепскім стане (хутчэй варыянт на дачу). Але народ у дні завоза прыходзіць. Пра закрыццё ніхто нічога не казаў.

Пад выглядам пакупнікоў Еўрарадыё патэлефанавала ў некалькі крамаў трох вялікіх сетак сэканд-хэнду ў Мінску, каб даведацца, ці падрыхтаваліся яны да новых умоў працы.

У адной краме сказалі, што цэны падняліся яшчэ месяц таму — да 79,90 за кг. Новы завоз адбываецца рэгулярна — раз на тыдзень. Аднак персанал не ведае, адкуль паступае адзежа.

У двух іншых крамах адназначна заяўляюць, што адзежа паступае з Еўропы, а цэны застаюцца нязменнымі. Замена асартыменту таксама адбываецца рэгулярна.

У наступнай краме адбыўся такі дыялог:

— А ці змяніліся цэны ў связі з забаронай увозу?
— Прыходзьце і паглядзіце.
— І ці рэчы ўчора завезлі з Еўропы?
— У нас уся прадукцыя ідзе з Еўропы.
— І так будзе далей?
— Час пакажа.

Апошняя крама была больш адкрытая да размовы. Там здзівіліся пытанню, ці адзежа паступае з Еўропы: “У якім сэнсе “з іншых краінаў”? Як ішла з Еўропы, так і ідзе”.

— Была ж уведзеная забарона на завоз.
— І што? Гэта ж забарона на завоз. Гэта ж праз мяжу нельга перавезці, ёсць жа іншыя спосабы перавозіць. Усё возіцца, як звычайна. Той жа тавар.
— Вы маеце на ўвазе ў аб’езд?
— Вядома. Знаходзяцца іншыя спосабы. Гэта паўплывала на ўсе сэканды, бо нельга ўвезці праз Літву ці Польшчу. Але ёсць жа іншыя спосабы. Магчыма, вырашаюцца пытанні. Тавар ідзе так жа сама, як і раней.
— А цэны?
— На цэны ў нас яшчэ нічога не паўплывала. У нас яшчэ ўсё ёсць, усе запасы, і тавар ідзе. Таму пакуль у нас усё добра.
— Пытанне, як будзе з новым таварам… напрыклад, праз месяц.
— У нас яшчэ такіх паставак не было. Як працавалі, так і працуем. [...] Гэта ж з першага кастрычніка, а тавараў у нас валам.