Рэпрэсіі не прынясуць беларускім уладам легітымнасці — кіраўнік МЗС Францыі
У Парыжы адбылася сустрэча Святланы Ціханоўскай і кіраўніка МЗС Францыі Жан-Іва Ле Дрыяна / @tsikhanouskaya
Рэпрэсіі і спробы дэстабілізаваць сітуацыю не прынясуць беларускім уладам легітымнасці. Гэта заявіў міністр замежных спраў Францыі Жан-Іў Ле Дрыян у відэакаментары, які ён запісаў па выніках сустрэчы са Святланай Ціханоўскай. Сустрэча адбылася напярэдадні ў Парыжы.
Легітымнасць у беларускіх уладаў, паводле яго слоў, "можа з'явіцца толькі ў выніку палітычнага дыялогу і правядзення свабодных і справядлівых выбараў пад міжнародным назіраннем".
Кіраўнік французскага МЗС адзначыў, што праз сустрэчу з Ціханоўскай хацеў бы перадаць беларускаму народу палітычнае пасланне салідарнасці. І гэтую салідарнасць выказваюць, з ягоных слоў, "і астатнія еўрапейцы ў сувязі з рэпрэсіямі з боку ўладаў у Мінску, якія толькі ўзмацніліся за апошні год".
#Biélorussie
— Jean-Yves Le Drian (@JY_LeDrian) September 15, 2021
J’ai souhaité réaffirmer la solidarité de la France avec le peuple biélorusse en recevant aujourd’hui à Paris @Tsihanouskaya.
Nous n’accepterons ni la répression brutale du régime, ni les actes de déstabilisations contre nos partenaires européens. pic.twitter.com/IHAkO85fif
Жан-Іў Ле Дрыян казаў і пра інцыдэнт з самалётам Ryanair, і пра міграцыйны крызіс. Ён адзначыў, што "французская тэхніка разгорнутая ў Літве, каб дапамагчы нашым партнёрам справіцца з гэтым нелегальным перамяшчэннем".
У праграме візіту Святланы Ціханоўскай у Парыж — таксама сустрэчы з прэзідэнтам Канстытуцыйнай рады Ларанам Фабіусам, мэрам Парыжа і кандыдатам у прэзідэнты Францыі Ан Ідальго, прадстаўнікамі парламента.
Літоўская дыпмісія ў Францыі прывітала Ціханоўскую нацыянальным сцягам. Ён быў вывешаны на балконе амбасады.
