Што вядома пра грамадзянку ЗША, якую вызвалілі ў Беларусі

Грамадзянка ЗША, якую беларускія ўлады вызвалілі ў дзень выбараў, нарадзілася ў Беларусі, паведамілі Еўрарадыё "Кіберпартызаны". Дзяўчына адвучылася ў Беларусі на педагога, а ў ЗША з'ехала яшчэ ў сярэдзіне 1990-х.

"Рэгулярна прылятала ў Беларусь, па некалькі разоў на год. Трымае свой пансіянат для сабак у штаце Тэхас", — расказалі "Кіберпартызаны".

Там дадалі, што беларуска працуе ў сферы інфармацыйных тэхналогій.

Пра яе затрыманне не было ніякай публічнай інфармацыі. Прычыны затрымання таксама невядомыя: улады Беларусі пра іх не паведамлялі, а Вашынгтон не публікуе імёны затрыманых грамадзян ЗША без згоды іх сваякоў.

Напярэдадні аб вызваленні грамадзянкі ЗША ў сваім твітар-акаўнце напісаў дзяржсакратар ЗША Марка Рубіа.

"Дзякуючы лідарству прэзідэнта ЗША Беларусь толькі што ў аднабаковым парадку вызваліла нявінную амерыканку Анастасію Нуфер, захопленую ў часы Джо Байдэна", — напісаў Рубіа.

Верагодней за ўсё, грамадзянку ЗША затрымалі ў Беларусі гэтай зімой — у снежні мінулага або студзені 2025 года.