Скінула 22 кг і не набрала. Прынцыпы захавання вагі даследчыцы Анхелы Эспіносы

18/07/2024 - 17:52

Даследчыца Анхела Эспіноса / Еўрарадыё

— Заўважаю, што тыя, хто аказваецца побач, паводзяць сябе больш зычліва і ветліва, чым калі я важыла больш. Гэта непрыемная праўда, — дзеліцца назіраннем з Еўрарадыё даследчыца, выкладчыца і паэтка Анхела Эспіноса.

Амаль тры гады таму дзяўчына здзівіла сяброў у сацсетках здымкамі ў новай прыгожай сукенцы. За дзевяць месяцаў Анхела схуднела на 22 кілаграмы, якія набрала падчас лакдаўна, пра што распавяла нам у інтэрв’ю.

Тады суразмоўніца не была гатовая агучыць сваю вагу, бо баялася, што зноў яе набярэ. Але прайшоў час — і са здымкаў у сацсетках нам працягвае ўсміхацца прыгожая і зграбная Анхела.

— Мне 31 год. Сёння я важу прыкладна 52-53 кілаграмы пры росце 158 сантыметраў. Стараюся не набіраць і не худнець больш чым на 1-2 кілаграмы, — кажа дзяўчына, якой мы патэлефанавалі зноў, каб даведацца, як ёй удаецца заставацца ў спартовай форме.

Дадавала па 100 калорый у дзень і сачыла, як мяняецца вага

Анхела Эспіноса: у кастрычніку 2021 года я зразумела, што адчуваю сябе здаровай і можна больш не худнець, а проста старацца ўтрымліваць вагу.

Таму пачала, як бы мовіць, адваротную дыету, бо арганізм атрымлівае даволі моцны шок, калі ты спачатку ясі мала, а пасля раптам пачынаеш есці шмат. Усё трэба рабіць паступова. Напрыклад, дадаваць 100 калорый у дзень, пасля — 200, і глядзець, як гэта ўплывае на вагу. Гэта трэба рабіць, пакуль ты не знаходзіш тую колькасць калорый, якая пасуе да ўтрымлівання вагі.

Дарэчы, пакуль я шукала сваю залатую сярэдзіну, дык скінула яшчэ парачку кілаграмаў. Пасля ўжо проста ўтрымлівала, не пакідаючы тых прынцыпаў, якіх трымалася пры дыеце.

Вядома, былі розныя перыяды, але вага ўжо асабліва не падымалася і не падала — максімум 2-3 кг уніз-уверх.

Не перастала лічыць калорыі

Як і раней, я працягваю лічыць калорыі аплікацыяй Myfitnesspal. Калі хочаце, можаце спампаваць нейкую аналагічную — іх даволі шмат.

Галоўнае, не рабіць так — маўляў, усё, я ўжо худы і не буду больш хвалявацца пра тое, што ем, хадзіць у трынажорку ці займацца спортам.
Трэба сябе кантраляваць.

Я ведаю, што па натуры мне будзе хацецца есці больш, чым патрэбна для здароўя. Таму, каб не збіцца, працягваю сачыць.

Але бываюць розныя сітуацыі: нейкія цяжкасці на працы, стрэс ці падарожжы.

Шпацырую, бегаю, хаджу ў залю

Часам здаралася, што ў мяне не было магчымасцей кантраляваць сябе ўважліва. Напрыклад, калі я ела не дома, дык не магла ведаць, як прыгатавалі гэтую страву і колькі там дакладна калорый. Але, калі ты доўга трымаешся дыеты, можна падлічыць іх на вока.

Скінула 22 кг і не набрала. Прынцыпы захавання вагі даследчыцы Анхелы Эспіносы

Абаяльная Анхела / Архіў даследчыцы

Яшчэ вельмі важна слухаць свой арганізм. Напрыклад, калі вы паелі нешта цяжкае на абед, не абавязкова вячэраць толькі праз тое, што прыйшоў час вячэры. Магчыма, вам ужо дастаткова.

Карацей, лічыць калорыі — гэта нашае ўсё. Прынамсі, гэта працуе ў маім выпадку. Я ведаю, што ёсць людзі, якія супраць гэтага. Маўляў, падлік калорый забівае радасць ужывання ежы і жыцця. Я так не думаю. Гэты працэс у мяне ўжо аўтаматычны. На падлік калорый у мяне звычайна сыходзіць ад 20 секунд да хвіліны ў дзень.

Я працягваю фізічную актыўнасць. Бываюць розныя перыяды, і трэба пад іх адаптавацца. Напрыклад, калі лета і цёпла, можна больш хадзіць, таму і есці можна таксама больш. Калі зіма — наадварот.

Тры-чатыры разы на тыдзень я хаджу ў залю. Вельмі шмат проста хаджу. Калі ёсць выбар паехаць ці прайсціся — не паеду.

І так, дарэчы, было заўсёды, але раней праз большую вагу я хутка стамлялася. Цяпер, калі надвор’е і час дазваляе, шпацырую.

Калі я кудысьці з’яжджаю і часу на спорт няма, ніякай трагедыі не адчуваю. Я ведаю, што ёсць людзі, якія кажуць, што залежныя ад залі ці прабежкі. На жаль, у мяне такіх залежнасцей не з’явілася.

Трэба ўтрымліваць нейкую раўнавагу і трэба абавязкова ўзважвацца. Не трэба баяцца гэтага, бо глядзіш ты на вагі ці не — твая вага ўсё роўна з табою. Але ж калі ты ўзважваешся, то кантралюеш любыя змены. Я раблю гэта як мінімум раз на тыдзень. Калі нешта змянілася, аналізую, што на гэта паўплывала.

Люблю гатаваць іспанскія стравы

Збольшага я гатую дома ці набываю тое, што можна лёгка праверыць. Я стараюся есці здаровыя стравы. Люблю гатаваць іспанскую ежу, бо яна не вельмі цяжкая: курыца, рыба, шмат розных салатак ці халодных супоў.

Дарэчы, кантраляваць вагу можна нават тады, калі ясі не вельмі здаровую ежу — проста падлічыць калорыі. Але трэба не забывацца, што нездаровая ежа можа быць шкоднай.

Салодкае я ем штодня, каб падтрымаць сваё псіхічнае здароўе. Без шакаладкі не жыву. Але заўсёды ўлічваю гэта пры падліку калорый.

Я літаральна вельмі лёгкая

Магу прабегчы, колькі трэба, калі трэба дагнаць аўтобус. Мне не балюча і не цяжка.

Вядома, чым больш чалавек здаровы, тым прыемней яму даецца нейкая фізічная актыўнасць. З іншага боку, гэта замкнёнае кола: калі здароўя мала, займацца спортам ці кантраляваць дыету цяжка.

Фізічныя змены паўплывалі на маё сацыяльнае жыццё

На жаль, так адбываецца, што грамадства звяртае шмат увагі на тое, як чалавек выглядае і як адпавядае пэўным канонам прыгажосці. “Што прыгожа — тое і добра” — так лічыць вельмі шмат людзей.

Я адчуваю, што людзі ставяцца да мяне па-іншаму: як даўно знаёмыя, так і тыя, з кім толькі пазнаёмілася.

Спачатку было цяжка з гэтым змірыцца, бо я той жа самы чалавек. Мой характар не змяніўся. Але змянілася вага, змяніўся выгляд — і вось змянілася ўсё ў прынцыпе.

Карацей, пакуль у нашым грамадстве чалавек, які мае здаровую вагу, лічыцца больш прыгожым за чалавека з лішняй вагой.

Падазраю, што менавіта праз гэта шмат людзей, якія скідаюць кілаграмы, не могуць пасля спыніцца і перабольшваюць. І пасля маюць вялікія праблемы, бо ў такіх людзей пачынаюцца фізічныя і псіхічныя хваробы.

Я добра разумею, як лёгка можна перабольшыць.

Новыя стасункі

Хлопец у мяне цяпер новы, але, дзякуй богу, гэта не звязанае з вагой. Хаця, магчыма, калі б не вага, было б інакш. Магчыма, у мяне былі лепшыя магчымасці сустрэць каханне, чым да страты вагі… Не ведаю.

З іншага боку, яшчэ адна непрыемная праўда жыцця ў тым, што ў свеце шмат самотных людзей — як з вялікай вагой, так і з малой.

Не трэба ставіць вагу вышэй за ўсё

Чаго не трэба рабіць і пакуль худнееш, і пасля? Не трэба ставіць вагу вышэй за жыццё. Вядома, што стыль жыцця трэба змяніць і ўсвядоміць, што гэта назаўжды. Але трэба пры гэтым прыдумаць, як правесці гэтыя змены так, каб яны не надакучылі.

Так, прыходзіцца абмяжоўвацца і адаптавацца, але, напрыклад, нельга адмаўляцца цалкам ад сацыяльнага жыцця. Так выйшла, што шмат усяго ў нашым жыцці круціцца вакол ежы: мы адзначаем святы, збіраемся з сябрамі на вячэры ці ходзім часам на піва — і гэта нармальна.

У падарожжы з сяброўкай / Архіў даследчыцы

Нельга ставіцца да сябе занадта строга

Нават калі здарылася памылка і вы пераелі, трэба сабе гэта прабачыць і на наступны дзень зрабіць усё па плане. Не трэба камплексаваць. Калі ты пераеў у адзін дзень — гэта не значыць, што пасля трэба нічога не есці два тыдні.

Калі ласка, стаўцеся да сябе з разуменнем.
Думайце, што гэты праект на ўсё жыццё, і хай ён будзе прыемным.
Можна прымяніць прынцып “80 на 20”. Калі 80 адсоткаў часу ты ясі правільна, ходзіш у трынажорку і жывеш так, як хочаш, то 20 адсоткаў можна і паесці, і нават трошкі выпіць.

Я дазваляю сабе алкаголь (але не заклікаю яго ўжываць). Трэба памятаць, што ён уплывае на вагу і падчас скідвання кілаграмаў лепш ад яго адмовіцца. Тым не менш, калі хочацца, адзін келіх у пятніцу выпіць можна, проста лічыце калорыі. Піць кожны дзень, калі хочаш выглядаць добра, не варыянт. Да таго ж алкаголь выклікае пачуццё голаду.

Карацей, усім хто скідае ці ўтрымлівае вагу, я хачу пазычыць поспехаў і радасці.

Высыпайцеся. Я ведаю, што рэгуляванне сну моцна дапамагае, але сама сплю кепска, і гэта ў мяне з дзяцінства.

Я не маю таленту гэта кантраляваць: калі з’яўляецца нейкая праблема, першае, што я губляю — гэта сон. З іншага боку, пасля таго як я схуднела, сама якасць майго сна палепшылася.