Стала вядома, колькі будзе каштаваць квіток на эвакуацыйны рэйс з Ізраіля
"Белавія" вывезе беларусаў з Ізраіля / Еўрарадыё
Квіток на эвакуацыйны рэйс з Ізраіля будзе каштаваць 550 долараў. Такую суму называе DW са словаў сваіх чытачоў.
У кошт квітка ўключаны багаж. Палёт працягнецца каля шасці гадзін.
Як распавядала Еўрарадыё, эвакуацыйны рэйс з Тэль-Авіва ў Мінск запланаваны на 6 лістапада (рэзервовая дата — 9 лістапада). Гаворыцца, што гэта будзе "гуманітарны рэйс на камерцыйнай аснове". Арганізоўвае яго авіякампанія "Белавія". Трапіць на яго могуць толькі грамадзяне Беларусі.
Квіткі на рэйс можна купіць альбо ў касах "Белавія" (што могуць зрабіць толькі сваякі ў Беларусі), альбо анлайн праз карту Visa.
Тэрарысты ХАМАС напалі на Ізраіль 7 кастрычніка. З таго часу не спыняюцца ваенныя дзеянні. Паведамляецца, што ў Ізраілі за гэты час загінулі трое грамадзян Беларусі і трое выхадцаў з нашай краіны.
