У ЗША і Чарнагорыі пракаментавалі інцыдэнт з удзелам Трампа ў Бруселі (відэа)
У ЗША і Чарнагорыі пракаментавалі інцыдэнт з удзелам Дональда Трампа ў Бруселі на саміце NATO. Падчас агляду новай штаб-кватэры альянсу амерыканскі прэзідэнт адштурхнуў чарнагорскага прэм’ера Душка Маркавіча, вызваляючы сабе шлях у першы шэраг. Відэазапіс неўзабаве з’явіўся ў інтэрнэце.
Маркавіч пасля назваў інцыдэнт “бяскрыўдным”. Паводле яго слоў, ён на яго нават не звярнуў увагі. “Я проста пабачыў рэакцыі ў сацыяльных сетках. Гэта проста бяскрыўдная сітуацыя”, — сказаў прэм’ер-міністр Чарнагорыі. Ён лічыць, што ў любым выпадку “натуральна, што прэзідэнт Злучаных Штатаў стаіць у першым шэрагу”.
Афіцыйны прадстаўнік Белага дома Шон Спайсер выказаў меркаванне, што расстаноўка лідараў краін-чальцоў NATO для фотаздымка магла быць вызначана загадзя, і Трамп проста заняў сваё месца.
