З'явіўся зварот прадстаўнікоў дэмсіл да беларусаў пра "бязвыбары-2025"
Пратэсты 2020-га ў Мінску / Reuters
З'явіўся зварот прадстаўнікоў дэмакратычных сіл да беларусаў пра "бязвыбары-2025". У відэароліку палітыкі, культурныя і грамадскія дзеячы разважаюць пра тое, як можна пераадолець любыя выпрабаванні.
"Мы ведаем, што сумленныя выбары будуць магчымыя толькі тады, калі ў краіну вернуцца незалежныя СМІ, — кажуць яны. — Калі людзі, якіх несправядліва асудзілі за палітычныя погляды, выйдуць на волю. Калі ва ўсіх будуць роўныя магчымасці для ўдзелу ў выбарах, калі нашыя галасы палічаць сумленна".
Яшчэ ў кастрычніку дэмсілы прынялі заяву пра "бязвыбары" прэзідэнта 2025 года ў Беларусі. У ёй агучаныя патрабаванні да рэжыму Аляксандра Лукашэнкі. Выбары ў атмасферы страху, рэпрэсій не могуць быць справядлівымі, заявіў Еўрапарламент.
Прэзідэнцкія выбары ў Беларусі прызначаныя на 26 студзеня 2025 года.
