Коктыш пра канцэпцыю інфабяспекі: Беларусь апынулася на чале міжнароднага трэнда

13/03/2019 - 13:38

12 сакавіка адбылося пасяджэнне Савета бяспекі Беларусі, прысвечанае новай канцэпцыі інфармацыйнай бяспекі краіны. Аляксандр Лукашэнка ўхваліў яе. А ўжо ўвечары копія гэтай канцэпцыі была злітая ў інтэрнэт.

Дацэнт кафедры палітычнай тэорыі Маскоўскага дзяржаўнага інстытута міжнародных адносін Кірыл Коктыш — адзін з тых, хто зацікаўлены, каб гэтая канцэпцыя была распрацаваная і прынятая. У размове з Еўрарадыё ён распавёў, што Беларусь адна з першых абвясціла лічбавы суверэнітэт:

“Беларусь адна з першых заявіла, што яна распаўсюджвае дзяржаўны суверэнітэт і на лічбавую прастору. Гэта значыць, што тыя злачынствы, якія адбыліся ці могуць адбыцца у беларускім інтэрнэце, будуць падпадаць пад заканадаўства Беларусі. Тое ж тычыцца і транзітных злачынстваў, якія праходзілі праз Беларусь. Усе даныя будуць празрыстыя і расследаваныя ўсімі зацікаўленымі бакамі”.

“Трэба навучыцца адказваць распаўсюджвальнікам фэйкаў іх жа зброяй”

Падчас пасяджэння Савета бяспекі Беларусі, Аляксандр Лукашэнка заявіў, што трэба пашыраць сферу ўплыву айчынных сродкаў масавай інфармацыі:

“Трэба не баяцца выкарыстоўваць новыя формы працы ў медыяпрасторы. Трэба навучыцца адказваць распаўсюджвальнікам фэйкаў іх жа зброяй. І мы гэта ўмеем рабіць, але чамусьці лічым: "Ды добра, абыдзецца, пранясе"”.

У кіраўніка краіны выклікае непакой нарошчванне дэструктыўных уздзеянняў на грамадства, маніпуляванне масавай свядомасцю, распаўсюджванне недакладнай інфармацыі:

"Менавіта з іх пачынаюцца сацыяльныя катаклізмы сучаснасці. У выніку пакутуюць мільёны людзей, мяняецца палітычная карта свету. Адсоўваюцца на другі план агульнапрынятыя нормы маралі. Жыццядзейнасць любой дзяржавы становіцца ўсё больш уразлівай ад камп’ютарных інцыдэнтаў".

Палітолаг Кірыл Коктыш лічыць вельмі істотным, што Беларусь пачала займацца менавіта інтэрнэт-бяспекай:

“Гэта вельмі істотна, бо дагэтуль мы жылі ў гэтай прасторы, але не разумелі, наколькі яна можа быць бяспечнай. Наколькі гэта іншае вымярэнне, якое патрабуе свайго рэгулявання. Спачатку інтэрнэт быў проста прасторай, дзе можна было рэалізавацца, гэта была прастора чыстай свабоды. А потым апынулася, што ўсе ад яе вельмі моцна залежныя, і трэба дбаць таксама пра бяспеку, бо тыя ж нашы тэлефоны ведаюць пра нас больш, чым мы самі".

Асноўны акцэнт канцэпцыі — нацыянальны суверэнітэт і культура

На думку Кірыла Коктыша, асноўны акцэнт апублікаванага дакумента зроблены на нацыянальным суверэнітэце і культуры:

"Галоўнае, што дэкларавала Беларусь, што беларуская мова і культура, беларускі погляд на рэчы з'яўляецца нацыянальным скарбам, які варта берагчы, шанаваць і вырошчваць. І ўсё, што ідзе на карысць Беларусі, трэба не толькі падтрымліваць, але і бараніць".

З'яўленне такіх канцэпцый можа стаць падставай для новых міжнародных законаў і норм, лічыць палітолаг, і Беларусь апынулася на чале гэтага міжнароднага трэнда:

"Гэтая канцэпцыя павінна легчы ў аснову тых ці іншых законаў. Немагчыма акрэсліць канкрэтныя межы, што вось гэта наша частка, а вось гэта — ўжо іншых. Трэба зараз будаваць міжнароднае права. І гэта галоўнае. Мне здаецца, па-першае, гэта будзе праца міністэрстваў замежных спраў. Каб узгадняць беларускія падыходы з суседзямі. Гэта лёсавырашальная падзея. Беларусь апынулася на чале сурьёзнага міжнароднага трэнда".

Поўная размова з Кірылам Коктышам:

Зліў канцэпцыі ў Telegram

Вельмі іранічна атрымалася, што пасля пасяджэння Савета бяспекі, у Telegram з'явілася копія канцэпцыі інфармацыйнай бяспекі Беларусі. Наколькі яна адпавядае канчатковаму варыянту, пакуль невядома. Афіцыйная публікацыя адбудзецца пазней і можа адрознівацца ад злітай у інтэрнэт.

На думку Кірыла Коктыша, гэты зліў мог быць спланаванай акцыяй, бо ў Беларусі, калі трэба, умеюць закрываць інфармацыю:

"Беларуская дзяржава, калі трэба закрыць нейкую інфармацыю, яе закрывае. А калі нейкая інфармацыя "ўцякае", значыць, вырашылі, што няблага будзе, калі і астатнія пра гэта даведаюцца".