Затрымалі трох падлеткаў, якія ўцяклі з Магілёўскай псіхіятрычнай лякарні
27 верасня ў Мсціславе затрымалі трох непаўналетніх падлеткаў, якія некалькі дзён таму ўцяклі з Магілёўскай псіхіятрычнай лякарні. Пра гэта паведамляе прэс-служба УУС Магілёскага аблвыканкама.
Як распавядала Еўрарадыё, 24 верасня хлопцы выбілі шыбу ў лякарні, дзе яны былі на абследаванні, і ўцяклі ў невядомым напрамку. 17-гадовыя Іван Янкоўскі і Аляксей Астапенка, а таксама 16-гадовы Кірыл Макар — навучэнцы сярэдніх спецыяльных устаноў.
Пасля ўцёкаў з лякарні яны ўгналі ў Магілёве тры аўтамабілі: "Волгу" і двое "Жыгулёў". "Волгу" і адны "Жыгулі" хлопцы кінулі на суседніх вуліцах з прычыны тэхнічнай няспраўнасці. А на цэлых "Жыгулях" яны паехалі ў Мсціслаў, дзе іх і спынілі супрацоўнікі ДАІ.
Цяпер падлеткаў затрымалі да выстаўлення абвінавачання ва ўчыненых злачынствах.
