Брэстаўчанін хоча абскардзіць у судзе рашэнне аб фарміраванні аблвыбаркаму

Брэсцкая абласная камісія па выбарах прэзідэнта была сфармаваная 20 ліпеня на сумесным пасяджэнні прэзідыума абласнога Савета дэпутатаў і абласнога выканаўчага камітэту.

У аблвыканкам былі дасланыя 28 заяваў на ўключэнне ў склад камісіі. Да разгляду былі дапушчаныя толькі 27 заяваў, бо адна з іх не адпавядала нормам Выбарчага кодэксу. У камісію была ўключаная максімальна дапушчальная колькасць — 13 чалавек.

Кіраўнік галоўнага ўпраўлення арганізацыйна-кадравай працы аблвыканкаму Сяргей Цімашук паведаміў прысутным, што пры абмеркаванні кандыдатур за аснову браўся досвед працы прэтэндэнтаў у выбарчых камісіях, іх працоўныя якасці, а таксама маштабнасць арганізацыі ці партыі, якую яны прадстаўляюць.

Як стала вядома Еўрарадыё, з такой фармулёўкай не пагадзіўся грамадскі актывіст Дзяніс Турчаняк. Ён вылучаў сваю кандыдатуру ад грамадзян шляхам падачы заяваў, але не трапіў у выбарчую камісію.

Па тлумачэнні актывіст звярнуўся да кіраўніка Брэсцкага аблвыканкаму Анатоля Ліса.

Турчаняк: “Я пацікавіўся ў Ліса назву нарматыўна-прававога дакумента, у якім указваліся б крытэрыі, на падставе якіх Цімашук з нейкай групай асоб праводзіў адбор кандыдатаў. На гэта Ліс адказаў, што крытэрыяў ніякіх не існуе і заканадаўствам яны не замацаваныя”.

Супярэчнасці ў словах чыноўнікаў стануць нагодай для судовага разбіральніцтва. Дзяніс Турчаняк збіраецца абскардзіць рашэнне прэзідыума абласнога Савету і аблвыканкаму, бо лічыць, што пры фармаванні выбарчай камісіі былі дапушчаныя парушэнні. Ён рыхтуе заяву ў Брэсцкі абласны суд, каб той даў прававую ацэнку прызнанню Сяргея Цімашука пра крытэрыі адбору, якіх у Выбарчым кодэксе не прадугледжана. Зрабіць гэта актывіст мусіць цягам двух дзён, бо ўжо 22 ліпеня пройдзе першае пасяджэнне новастворанай камісіі.

Фота: БелаПАН