Допыты на мяжы Беларусі: хто і чаму трапляе на "гутарку" з сілавікамі

Як паведамляў Мост, у 2020 годзе жыхарка Брэста зрабіла ахвяраванне ў фонд салідарнасці BYSOL. У 2021 годзе яна з'ехала з мужам у Польшчу на вучобу і забылася пра перавод. 

Улетку гэтага года, вяртаючыся на радзіму на пахаванне блізкага сваяка, яе затрымалі на мяжы. Яна заплаціла штраф у 250 разоў большы за данат.

Калі вы замежнік (асабліва ўкраінец)

Праверкі на мяжы ў дачыненні да ўкраінцаў пачаліся пасля пачатку вайны. І працягваюцца дагэтуль. Калі пагартаць памежныя чаты, затрымкі рэйсавых аўтобусаў у бок Беларусі часцей за ўсё звязаныя менавіта з допытамі ўкраінцаў. Прычым правяраюць усіх. А агульны час прастою на мяжы можа даходзіць да 9 гадзін.

Як піша "BGmedia" людзі ў чатах пішуць такія паведамленні:

"У сярэднім аўтобусам хутчэй, калі не будзе шмат пасажыраў з Украіны і выпадкам не паедзе дадому "экстрэміст". У нас адзін аўтобус 10 гадзін стаяў на беларускім баку, чакаў, калі апытаюць украінцаў".

Часцей за ўсё ў людзей правяраюць тэлефоны, пытаюцца пра мэту візіту ў Беларусь і далейшы маршрут перамяшчэння. Не абыходзіцца і без пытанняў пра стаўленне да вайны.

Па словах мужчыны, яго завялі на гутарку з чалавекам у форме памежніка. Ён пытаўся пра тое, ці ёсць у яго сваякі ва Украіне, ці служыць хтосьці з яго знаёмых ва УСУ і чым ён увесь гэты час займаўся ў Польшчы.

Акрамя гэтага, сілавік папрасіў паказаць яму мэсенджары, спіс кантактаў і галерэю.

У іншага мужчыны — Канстанціна, з якім пагаварыла выданне, памежнікі пыталіся прычыну доўгай адсутнасці ў Беларусі. Таксама ён расказаў, што пазнаёміўся з жанчынай з Мінска, якая расказала, што цяпер на гутарку выклікаюць усіх, хто не быў у Беларусі больш за паўгода.

Летась паведамлялася, што памежнікі масава пачалі патрабаваць прад'яўляць від на жыхарства замежнай дзяржавы, калі ён ёсць. Гэта нібыта рабілася для таго, каб зразумець, на якой падставе беларусы першапачаткова заязджалі ў Польшчу без візы.

"Гутаркі" не толькі на мяжы

Гутарка з сілавікамі можа адбыцца неабавязкова на памежным пункце, Еўрарадыё вядома і пра выпадкі, калі ўжо пасля прыезду дадому, беларусаў выклікалі на размову ў КДБ.

Дзяўчына, якая ўжо доўгі час жыве за мяжой і нават выйшла замуж за замежніка, расказала, што ў той жа дзень, калі яна прыехала дадому, ёй патэлефанавалі з КДБ.