Мінабароны Беларусі абвяргае звесткі пра адлёт расійскіх самалётаў
Расійская ваенная авіяцыя працягвае несці баявое дзяжурства на беларускіх аэрадромах.
Міністэрства абароны Беларусі, ВПС і войскі СПА абверглі звесткі пра тое, што расійская авіяцыя, якая базавалася на аэрадромах у Баранавічах і Бабруйску, пакінула месца дыслакацыі.
Як паведамляе БелаПАН са спасылкай на Мінабароны, камандуючы Ваенна-паветранымі сіламі і войскамі супрацьпаветранай абароны генерал-маёр Алег Дзвігалёў сапраўды пабываў у Баранавічах і Бабруйску. Але ён прыехаў для таго, каб выказаць падзяку расійскім лётчыкам за дапамогу ў арганізацыі паветранай бяспекі падчас чэмпіянату свету па хакеі.
Пасля завяршэння чэмпіянату аэрадром у Баранавічах пакінуў толькі самалёт далёкага радыёлакацыйнага выяўлення А-50 расійскіх ВПС. Тут застаюцца чатыры знішчальнікі Су-27, у Бабруйску — шэсць Су-27.
Фота — naviny.by
