“Самы небяспечны момант эскалацыі”. Ці пачнецца ядзерная вайна?

Байдэн дазволіў Украіне выкарыстоўваць ракеты ATACMS для ўдараў па тэрыторыі РФ. Ці можа гэта справакаваць Расію на ядзерную вайну, разважае ў эфіры Еўрарадыё гісторык і палітычны аглядальнік Аляксандр Фрыдман.

Эксперт спадзяецца, што ніякай ядзернай вайны не будзе, і кажа, што Украіна ўжо паказала ўсяму свету, што расійскія пагрозы так і застаюцца пагрозамі.

— Пяскоў сёння так і падкрэсліў, што згодна з новым варыянтам ядзернай дактрыны, выкарыстанне Украінай гэтых ракет можа быць падставай для ядзернага ўдару. Фактычна яны падрыхтавалі сваю аўдыторыю да ядзернага ўдару. 

Калі паглядзець на расійскія сацыяльныя сеткі і асабліва на тое, што пішуць людзі, якія падтрымліваюць рэжым Пуціна, ну дык там усе пішуць, як кажа Маргарыта Сіманьян, “што мы пападзем у рай, а ўсе на Захадзе накіруюцца ў пекла”. Усе гэтыя дыскурсы прысутнічаюць. Цяпер мяч на расійскім баку.

Фрыдман адзначае, што працягваць пагрозы прымянення ядзернай зброі выглядае бессэнсоўна, бо відавочна, што гэтая стратэгія не дала чаканага эфекту.

— Яны ж нават Пуціна задзейнічалі. Нават Пуцін казаў, што будзе прамы адказ і што яны будуць разглядаць заходнія краіны як тых, хто вядзе з Расіяй вайну. Ну вось цяпер Расія павінна прадэманстраваць, што яна можа зрабіць. 

Я не думаю, шчыра кажучы, што Пуцін вырашыць у гэтай сітуацыі пайсці на такі радыкальны крок. Расійскі бок сам сябе накручвае. 

Але верагоднасць усё ж такі існуе. Зараз мы перажываем самы небяспечны момант эскалацыі ў гісторыі гэтай вайны і, магчыма, самы небяспечны момант у еўрапейскай гісторыі з 1945-га.