У 2019-м з'явіцца 520 км новых і хуткасных дарог, 2-я кальцавая — праз год

Урад зацвердзіў дзяржпраграму па развіццю аўтадарог Беларусі на 2015–2019 гады. Папярэднюю праграму "Дарогі Беларусі" на 2006-2015 гады прызналі неэфектыўнай з-за недахопу фінансавання (менш за 50% ад патрэбы) і скасавалі.

Планавалася палепшыць стан 8,6 тысяч кіламетраў дарог, а палепшылі толькі 4,3 тысячы. Да 2015 года мусілі пазбавіцца ад дарог з нездавальняючым станам, але іх стала каля 3,4 тысяч кіламетраў. З 2230 мастоў нарматывам не адпавядае амаль кожны трэці — 706. Каля 11 тысяч дарог не маюць цвёрдага пакрыцця, і ездзіць па іх у кепскае надвор'е праблематычна.

Капітальнага рамонту патрабуюць 2 494 км рэспубліканскіх дарог (16%), бягучага рамонту 4 236 км (27%). 3 тысячы 397 км рэспубліканскіх дарог маюць роўнасць, якая не адпавядае нормам, 2 тысячы 293 км дарог маюць трываласць ніжэй за тую, што патрабуецца.

Фінансаванне дзяржпраграмы на 2015-2019 гады

Агулам патрэбна 89 трльёнаў 251 мільярдаў рублёў. Пры чым дзяржпраграма разлічвалася зыходзячы з коштаў 2014 года. Большая частка сродкаў ідзе з дзяржбюджэту і крэдытаў (графік уверсе).

За гэтыя 5 гадоў дзяржава плануе сабраць амаль 6 трыльёнаў за праезд па платных дарогах. Яшчэ каля 5 трыльёнаў чакаецца ад збору пошліны за допуск аўтамабіляў да ўдзелу ў дарожным руху.

З агульнай сумы больш за 66 трыльёнаў рублёў патрацяць на ўтрыманне дарог, бягучы і капітальны рамонт, рэканструкцыю і будаўніцтва дарог.

Цэмент для парковак — большасць дарог будуць з асфальту

Кіраўнік Беларусі Аляксандр Лукашэнка казаў, што для будаўніцтва дарог трэба выкарыстоўваць беларускі цэмент. Згодна з дзяржпраграмай, цэментна-бетоннае пакрыццё, будуць рабіць на пляцоўках для стаянкі і адпачынку, пешаходных і веласіпедных дарожках. Беларускі цэмент таксама будзе выкарыстоўвацца пры ўзвядзенні мастоў і іншых элементаў, для будаўніцтва і рамонту дарог. Самі ж дарогі будуць з асфальтабетону.

Платных дарог стане больш

Да 2020 года працягласць платных дарог павялічыцца да 1968 км. За 2015-2019 плануюць сабраць 5,7 трыльёнаў рублёў за праезд па іх. Сабраныя грошы накіруюць на рамонт, утрыманне і развіццё, у першую чаргу, платных дарог.

Платнымі стануць: М-6/Е 28 Мінск — Гродна — мяжа Рэспублікі Польшча (Брузгі) пасля яе рэканструкцыі, на ўсім працягу дарогі М-5/Е 271 Мінск-Гомель, на участках дарог М-8/Е 95 мяжа Расійскай Федэрацыі (Езярышча) — Віцебск — Гомель — мяжа Украіны (Новая Гута), М-12/Е 85 Кобрын — мяжа Украіны (Макраны), Р-21 Віцебск — мяжа Расійскай Федэрацыі (Лёзна), Р-23 Мінск-Мікашэвічы, Р-99 Баранавічы — Ваўкавыск — Пагранічны — Гродна.

Хуткасных дарог стане больш

Бяспеку дарог плануюць палепшыць за кошт размяшчэння над пешаходнымі пераходамі жоўтых святлодыёдных ліхтароў, дарожных знакаў з матэрыялу з высокай інтэнсіўнасцю святлозвароту, каляровай разметкі пешаходных пераходаў, святлоадбівальных элементаў, сеткі для прадухілення выхаду дзікіх жывёл на праезную частку, штучнае асвятленне пешаходных пераходаў, агароджаў у месцах z-падобных пешаходных пераходаў, штучныя няроўнасці ў выглядзе каляровых шумавых палос і прыпаднятых пешаходных пераходаў на кругавых скрыжаваннях малога радыусу аўтамабільных дарог агульнага карыстання, якія праходзяць па гарадах і гарадскіх пасёлках.

За кошт гэтых мераў павысіць хуткасны рэжым плануюць на 520 км аўтамабільных дарог і павялічыць працягласць хуткасных дарог да 1587 км.

Якія дарогі плануюць пабудаваць і рэканструяваць?

Агулам за 5 гадоў плануюць пабудаваць і рэканструяваць 520,8 км дарог. Найменш у 2015 годзе — 55,1 км.

Фота: bankoboev.ru