Знойдзеная скрынка, якая не падабаецца нават катам. #ІхНоравы

23/05/2024 - 13:43

#ІхНоравы / @rubanau_collage

Памятаеце, як вы назіралі за палётам Нэнсі Пелосі на Тайвань? Тады па ўсім свеце замерла шмат сэрцаў.

Ад якіх сусветных навін заміраюць сэрцы сёння? Не паверыце, зноў Тайвань.

Кітай робіць нервы

На Тайвані правялі інаўгурацыю прэзідэнта Уільяма Лая, і Кітай у якасці адплаты пачаў двухдзённыя вайсковыя вучэнні вакол вострава. Гэта нібы такі "намёк" за дэманстрацыю "сепаратызму". Кітай лічыць Тайвань сваёй правінцыяй, якая адкалолася, а сам востраў лічыць сябе незалежным.

Міністэрства абароны Тайваня асудзіла кітайскія вучэнні і назвала іх "ірацыянальнай правакацыяй".

Не першай. За апошні год Кітай неаднаразова праводзіў рэпетыцыі таго, як будзе атачаць Тайвань знішчальнікамі і вайсковымі караблямі. Новаабраны прэзідэнт паабяцаў, што працягне абараняць дэмакратыю і незалежнасць Тайваня.

Скажы мне, хто твой вораг (і я скажу, што ты рэспубліканец)

У Амерыцы цяпер усе абмяркоўваюць, што Нікі Хейлі, якая крытыкавала Дональда Трампа, раптам упісалася за яго. Дакладней, паміж Джо Байдэнам і Трампам абрала Трампа.

Як і Трамп, Хейлі — рэспубліканка. Яна спаборнічала з былым прэзідэнтам за магчымасць прадставіць Рэспубліканскую партыю на сёлетніх выбарах. Не проста спаборнічала — яна была самым рэзкім крытыкам Трампа на праймерыз. У сакавіку Хейлі знялася з гонкі і з таго часу публічна не выказвалася.

Але тут журналісты задалі ёй пытанне: хто лепш справіцца з рашэннем пытанняў нацыянальнай бяспекі — Байдэн ці Трамп? І Хейлі пералічыла спіс сваіх прыярытэтаў: тут і важнасць падтрымкі саюзнікаў, і гатоўнасць прыцягваць ворагаў да адказнасці, і падтрымка капіталізму, і скарачэнне дзярждоўгу.

"Трамп не быў ідэальны ў гэтай палітыцы, — сказала Хейлі. — Я ясна дала гэта зразумець шмат-шмат разоў. Але Байдэн стаў катастрофай. Таму я буду галасаваць за Трампа".

Але гэта не ўсё. Хейлі тут жа дадала, што Трампу варта было б звярнуцца да мільёнаў патэнцыйных выбаршчыкаў і абвясціць пра зняцце кандыдатуры на карысць яе, Нікі Хейлі.

"І я шчыра спадзяюся, што ён гэта зробіць", — дадала Хейлі.

А што пра гэта думае Джо Байдэн? Байдэн жартуе:

"Дазвольце мне сказаць, што ў маёй кампаніі заўсёды знойдзецца месца для выбаршчыкаў Хейлі".

Кот у скрынцы (і яму не падабаецца)

У сеціве з'явіліся кадры з гандлёвымі аўтаматамі, у якіх прадаюцца... жывыя жывёлы. Праз такі аўтамат можна купіць ката, маленькага сабачку ці грызуна. Само сабой, многія абурыліся (а тыя, хто не абурыўся, здзівіліся ці былі шакаваныя, спектр рэакцый невялікі).

Прадаўца побач з аўтаматам няма. То-бок купіць сабаку, на думку аўтараў ідэі, мусіць быць гэтак жа проста, як букет кветак ці кубак кавы.

Відэа з такім аўтаматам, усталяваным у Пекіне, завірусілася ў сацсетках і выклікала спрэчкі наконт этычнасці такога бізнэсу (хоць незразумела, пра што тут спрачацца, так?).

Кот у скрынцы

Відаць, гэта першыя скрынкі, якія не падабаюцца нават катам.

Карычневы — новы зялёны

У Буркіна-Фасо працуе гольф-клуб, у якім няма зеляніны. Вы думаеце, гэта наступствы глабальнага пацяплення, бо мы кепска клапаціліся пра прыроду? Не зусім.

Аказваецца, амерыканскія гольф-палі выпіваюць проста гіганцкія аб'ёмы вады — мільёны літраў за дзень. А гэты гольф-клуб, адмовіўшыся ад травы, абыходзіцца ўсяго 200-300 літрамі за дзень. Там кажуць: "Наш зялёны колер — гэта карычневы".

Дазволіць сабе мільёны літраў вады ў краіне, дзе вада — дэфіцытны тавар, тут проста не могуць. У Буркіна-Фасо наогул усяго 47% насельніцтва мае доступ да чыстай пітной вады побач з домам.

Дажджы тут бываюць, але інфраструктура для захоўвання вады дрэнная. Жанчыны і дзеці вымушаныя хадзіць да калодзежаў. Марнаваць ваду на гольф у такіх умовах было б яшчэ горш, чым прадаваць катоў праз аўтаматы.

А гуляць у гольф усё роўна хочацца!

"Мы гуляем з зямлёй, пылам, з прыродай, якая ў нас ёсць. Мы не ссеклі ніводнага дрэва", — кажуць у клубе.

У такім кантэксце карычневы — гэта не толькі новы зялёны, але і новы чорны. Гэтай дзіўнай метафарай мы спрабуем нагадаць, што клапаціцца пра прыроду — гэта модна (каб наш зялёны не стаў як у Буркіна-Фасо).

Каб сачыць за галоўнымі навінамі, падпішыцеся на канал Еўрарадыё ў Telegram.

Мы штодня публікуем відэа пра жыццё ў Беларусі на Youtube-канале. Падпісацца можна тут.