Ад дзейнасці сацсеткавай крамы “Маргарытка” пацярпела больш за 30 чалавек
Ад дзейнасці сацсеткавай крамы “Маргарытка” пацярпела больш за 30 чалавек. Пра гэта Еўрарадыё заявіў афіцыйны прадстаўнік упраўлення Следчага камітэту па Мінску Аляксей Клімовіч:
“На дадзены момант можна казаць пра больш, чым 30 эпізодаў, якія ўжо выяўленыя следствам. Следствам разам з аператыўнымі супрацоўнікамі ГУУС Мінгарвыканкама праводзіцца комплекс мераў па высвятленні дакладнай колькасці пацярпелых. Бо заявы ў міліцыю працягваюць паступаць”.
Вядома, што цяпер пададзена каля 200 заяваў ад пакупнікоў “Маргарыткі”.
Па версіі следства, сацсеткавую краму маці і дачка стваралі, не збіраючыся выконваць фінансавыя абавязкі. Крама ў выглядзе групы ў сацыяльных сетках была створаная на пачатку 2015 года спярша ў "Аднакласніках", а пазней і ў "Вконтакте" ды Facebook. Ініцыятаркі прапаноўвалі купіць розныя тавары па коштах, ніжэйшых за рынкавыя. Для замовы пакупнік мусіў пералічыць поўны кошт пакупкі на адзін з разліковых рахункаў.
Упраўленне Следчага камітэта па Мінску пачало крымінальную справу на стваральніц крамы. Сума, на якую падманулі сваіх кліентаў прадпрымальніцы, пакуль не агучваецца.
