Amnesty International патрабуе ад Латвіі адмяніць рэжым НС на мяжы
"Латвія жорстка абыходзілася з людзьмі на мяжы з Беларуссю і нават катавала іх, месяцамі ўтрымліваючы іх у лесе" / pixabay
Міжнародная няўрадавая арганізацыя Amnesty International раскрытыкавала намер Латвіі падоўжыць надзвычайнае становішча на мяжы з Беларуссю. З ініцыятывай падаўжэння выступіла МУС краіны.
Упершыню надзвычайнае становішча ў некаторых памежных рэгіёнах урад Латвіі абвясціў 11 жніўня 2021 года. З тых часоў яго некалькі разоў падаўжалі. Рэжым надзвычайнага становішча павінен быў скончыцца 10 жніўня 2022 года, але ў МУС мяркуюць, што сітуацыя ўсё яшчэ не пад кантролем.
"Мігрантаў і бежанцаў, у асноўным з Ірака і Афганістана, у тым ліку дзяцей, кідалі на волю лёсу ў маразы ў лесе. Латвія жорстка абыходзілася з людзьмі на мяжы з Беларуссю і нават катавала іх, месяцамі ўтрымліваючы іх у лесе. Для многіх адзінай альтэрнатывай была згода вярнуцца "добраахвотна" ў сваю краіну, часам пад пагрозай гвалту", — гаворыцца ў звароце Amnesty International у Twitter.
Арганізацыя заклікала ўлады Латвіі не працягваць рэжым надзвычайнага становішча на мяжы з Беларуссю. І вярнуць права папрасіць прытулку ў краіне "ўсім, хто шукае бяспекі, незалежна ад таго, хто яны і як яны перасеклі мяжу".
Latvia is proposing to extend the state of emergency at the Belarus border until November, which would extend suspension of asylum and pushbacks, violate international human rights law and since August 2021, has endangered the lives of many migrants and refugees at the border. pic.twitter.com/82P2NgopxY
— Amnesty International (@amnesty) July 26, 2022
Абстаноўка на беларуска-латвійскай мяжы
Памежнікі па-ранейшаму выяўляюць выпадкі нерэгулярнага перасячэння мяжы, хоць цяпер гаворка ідзе пра адзінкавыя выпадкі. У траўні латвійскія памежнікі затрымалі 20 чалавек, якія спрабавалі трапіць у ЕС у абыход правілаў, у чэрвені — 96 чалавек, у ліпені — 5 чалавек.
У МУС адзначаюць, што Польшча ўжо завяршыла будаўніцтва агароджы на мяжы з Беларуссю, на літоўска-беларускай мяжы плот узводзяць проста цяпер. Будаўніцтва такой агароджы на беларуска-латвійскай мяжы таксама плануецца пачаць у найбліжэйшы час.
У Латвіі непакояцца, што ў той час, пакуль плот яшчэ не пабудаваны, колькасць спробаў перасячэння мяжы ў абыход працэдураў можа вырасці.
