Стварыць веламіліцыю і забараніць шэрынг: што беларусы прапануюць змяніць у ПДР

26/09/2024 - 16:38

Краіне патрэбныя новыя міліцыянеры / unsplash.com

"У маёй маці хворыя ногі, сядзячы электрасамакат для яе — адзіны даступны спосаб перамяшчэння"...

Больш за паўтысячы каментароў пакінулі беларусы пад праектам змяненняў у Правілы дарожнага руху на Нацыянальным прававым партале. У публічных абмеркаваннях знайшлося месца як крытыцы, так і прапановам — аж да стварэння веламіліцыі.

Забарона перасякаць пешаходныя пераходы на роварах і электрасамакатах, якія чыноўнікі адносяць да сродкаў персанальнай мабільнасці, па-ранейшаму застаецца самым спрэчным пунктам. Але ёсць і іншыя пытанні — напрыклад, абмежаванне хуткасці СПМ да 25 км/г.

Выказваючыся "за" або "супраць" меркаваных правілаў, беларусы дзеляцца асабістымі назіраннямі і перажываннямі. Яны датычацца як пешаходаў, так і кіроўцаў усіх відаў транспарту, але асабліва — недасканаласці інфраструктуры, "з якой і варта было б пачынаць".

На што менавіта звяртаюць увагу беларусы і якую прапануюць альтэрнатыву чарговым забаронам на дарогах, чытайце ў аглядзе Еўрарадыё.

Каб дабрацца да працы, прыйдзецца спешвацца 41 раз

"Пры перасячэнні праезнай часткі веласіпедыст, кіроўца сродку персанальнай мабільнасці абавязаны спешвацца", — менавіта гэты пункт законапраекта выклікаў найбольшую крытыку ў беларусаў.

"Штодня па маім стандартным маршруце дом — работа ў горадзе Мінску (Каменная Горка — Навінкі) на СПМ я перасякаю праезную частку 41 (пропіссю: сорак адзін) раз, — піша жыхар сталіцы. — Толькі шэсць пераходаў з'яўляюцца рэгуляванымі (абсталяванымі святлафорамі для пешаходаў), тры з іх з'яўляюцца камбінаванымі пешаходнымі і велапераходамі, ні адзін не абсталяваны асобным святлафорам для рэгулявання руху веласіпедыстаў. І гэта ў Мінску!
Ці няма адчування ў законатворцаў, што змены створаць велізарнае мноства складанасцяў для кіроўцаў сродкаў персанальнай мабільнасці? Чым абумоўленае такое ўзмацненне жорсткасці?”

І падобных каментароў у абмеркаванні — некалькі сотняў.

Вось яшчэ прыклад:

"У Брэсце ўсяго два скрыжаванні, дзе ёсць святлафоры, якія рэгулююць веларух. У сярэднім маршрут па горадзе ў веласіпедыстаў горада ад дома да працы і назад — сем кіламетраў. Пры гэтым як мінімум больш за 10 пешаходных пераходаў. Спешвацца на кожным веласіпедыстам і карыстальнікам СПМ будзе вельмі нязручна, адсюль робіцца выснова, што канфліктных сітуацый стане ў разы больш, гэтаксама як і ДТЗ.

Прапаную пакінуць пункт пра зніжэнне хуткасці да хуткасці пешахода, які ідзе крокам, і павялічыць штраф за парушэнне гэтага пункта, а таксама павялічыць кантроль за гэтым. Павялічыць кантроль за транспартнымі сродкамі на скрыжаваннях, бо многія кіроўцы пры павароце направа/налева занятыя размовай па тэлефоне, а таксама не зніжаюць хуткасці перад нерэгуляванымі пешаходнымі пераходамі. На скрыжаваннях абсталяваць як мага больш святлафораў для веласіпедыстаў або размежаваць патокі ТС і пешаходаў. То-бок калі пешаходам загарэўся зялёны, то на буйных скрыжаваннях паварот направа ў гэты час павінен быць забаронены з выкарыстаннем дадатковай секцыі на святлафоры.

Наконт сродкаў персанальнай мабільнасці. Да дадзенай катэгорыі трэба аднесці толькі самыя простыя самакаты і трохколавыя электраскутары, у якіх хуткасць вельмі малая. У асноўным трохколавыя электраскутары выкарыстоўваюць пенсіянеры і людзі з абмежаванымі магчымасцямі. Спешвацца для іх — гэта вельмі вялікая праблема.

Усе астатнія СПМ аднесці да катэгорыі "мапед" і "матацыкл". Кіраванне імі толькі з 16 гадоў пры наяўнасці ПК адпаведнай катэгорыі".

"Нам трэба развіваць веларух, гэта ўсё ж такі экалогія і здароўе, — нагадвае жыхар Гродна. — Спешванне на пешаходных пераходах можа адбіць жаданне ездзіць на ровары. У Гродне мне да працы каля 20 пешаходных пераходаў, калі праехаць у іншы канец горада — каля 50. Такое сабе задавальненне, калі спешвацца. Проста патрэбны кантроль перасячэння з усімі наступствамі".

Наступныя заўвагі і прапановы публікуем ад першай асобы.

Няхай тармозяць аўтаўладальнікі

"Мая маці з хворымі нагамі можа перасоўвацца толькі на сядзячым электрасамакаце. Злазіць і залазіць на яго на кожным пешаходніку ёй фізічна цяжка. І рабіць гэтага яна не будзе, нават калі вы ёй забароніце. Прасцей штраф заплаціць. І такіх людзей, як яна, шмат. Які сэнс тады ў гэтых зменах?

Прапаную абмежаваць хуткасць аўтатранспарту на скрыжаваннях, святлафорах, пешаходніках да хуткасці пешахода, як зрабілі гэта для веласіпедыстаў. Тады ўсе змогуць пазбягаць сутыкненняў без праблем".

Создать веломилицию и запретить шеринг: что белорусы предлагают изменить в ПДД

Наперад! / unsplash.com

Арэнда самакатаў — зло

"Значная частка ўсіх змяненняў ствараецца праз павелічэнне колькасці ДТЗ. Але ніхто не кажа пра тое, што большая частка ДТЗ (па маіх назіраннях, мяркую, лічбы ў раёне 90-95%) — гэта выключна шэрынг-самакаты.

Ва ўказе не хапае пункта забароны арэнды самакатаў, на якіх больш за ўсё было здзейсненых ДТЗ. Бо ў чалавека, які арандуе, не правяраюць стан свядомасці і навыкі кіравання самакатам.

Людзі на сваіх уласных самакатах у большасці выпадкаў паводзяць сябе адэкватна на дарозе (так, дурні ёсць усюды, у тым ліку кіроўцы аўтамабіляў). Рэгулюйце шэрынг самакаты асобна ад прыватных".

Не забараніць арэнду, але абмежаваць

"Прапаную ўвесці правіла: выкарыстоўваць электрасамакаты строга з 18 гадоў. Абавязкова — шлем. Узмацніць кантроль ДАІ на веладарожках. Асабліва, што тычыцца шэрынгу. Пастаянна бачу, як ездзяць па двое і трое, зусім дзеці гадоў па 8-12. Таксама лічу, што трэба забараніць пешаходам выходзіць на веладарожкі".

Пешаходы сталі нахабныя, патрэбны велапатруль!

"Дагэтуль у Беларусі няма выразнай і адназначнай забароны для пешаходаў на выхад на веладарожку і велапераезд. Людзі масава лезуць пад колы на пераездах і веладарожках. Ствараюцца сітуацыі, вельмі небяспечныя для жыцця і здароўя як веласіпедыстаў, так карыстальнікаў СПМ і пешаходаў, якія выходзяць на веладарожкі. Для іх там няма месца. Прапаную: увесці штраф для пешаходаў за хаджэнне па веладарожках і велапераездах. Тое ж самае за катанне па веладарожках на лыжаролерах, на ролікавых каньках, таму што ў такіх выпадках таксама ствараецца небяспека для ўсіх удзельнікаў руху на веладарожках.

На веладарожках у цэлым пануе безуладдзе.

Шэраг асоб ездзіць як хочуць. Не разумеюць, што ёсць правілы абгону, што ўвечары трэба ездзіць з ліхтарыкамі. Нярэдка на чорным ровары ў чорнай вопратцы без флікераў, ліхтароў і катафотаў па неасветленых частках веладарожак ездзяць у цёмны час сутак. У тым ліку гэта робяць на роварах шашэйнага тыпу з вялікай хуткасцю. Неабходна стварэнне веламіліцыі для рэйдаў. Прапаную дазволіць веламіліцыі рухацца на электравеласіпедах з рухавікамі, магутнасць якіх перавышае ўстаноўлены зараз ліміт. Таксама прапаную такім патрулям дазволіць перавышаць хуткасць 25 км/г, каб можна было лёгка дагнаць парушальніка".

Яшчэ больш міліцыі / unsplash.com

Больш сацыяльных відэа

"Выказваю нязгоду ў частцы:

1). Спешвацца на пешаходных пераходах.

2). Канструктыўная хуткасць не большая за 25 км/г.

Каб знізіць аварыйнасць сярод удзельнікаў на сродках індывідуальнай мабільнасці (СІМ) і роварах, трэба рабіць больш сацыяльных відэа з прыкладамі, як удзельнікі дарожнага руху дапускаюць парушэнні або дастаўляюць дыскамфорт іншым удзельнікам дарожнага руху, і прыклады, як трэба дзейнічаць правільна і ў рамках ПДР РБ. Гэтыя відэа павінны быць арыентаваныя на розныя ўзроставыя групы з улікам іх інтарэсаў.

Наша краіна павінна імкнуцца да паляпшэння экалагічнага становішча, для гэтага СІМ і ровары павінны быць зручным відам транспарту".

Канструктыўная хуткасць 25 км/г і монаколы несумяшчальныя

"6 гадоў езджу на розных монаколах і бачу ў іх вельмі перспектыўны гарадскі і не толькі сродак персанальнай мабільнасці. Аднак дадзенае абмежаванне максімальнай канструктыўнай хуткасці руху зробіць усё монаколы па-за законам.

Бо іх прынцып работы для падтрымання балансу прадугледжвае электрарухавік магутнасцю не менш за 800 Вт, што непазбежна вядзе да большай канструктыўнай хуткасці, чым 25 км/г. Монаколы меншай магутнасці з'яўляюцца па сутнасці дзіцячымі: не могуць бяспечна спраўляцца з вагой дарослага чалавека і маюць вельмі малую далёкасць ходу на адным зарадзе.

Разглядаць монакола як ТС таксама не бачу сэнсу, бо яно занадта небяспечнае пры выкарыстанні на праезнай частцы разам з аўтамабілямі. Таму прапаную: пакінуць монаколы як СПМ. Але ўвесці паняцце "праграмнае абмежаванне хуткасці да 25 км/г".

Кожная прылада мае магчымасць абмежавання хуткасці праз спецыяльныя агульнадаступныя праграмы для смартфонаў. Абавязаць карыстальнікаў мець усталяваную праграму з усталяваным у ім абмежаваннем хуткасці для прад'яўлення яго пры праверцы супрацоўнікамі правапарадку. Таксама падчас руху ўключаць святло фары для лепшага абазначэння сябе. У адваротным выпадку мы страцім вельмі зручны сродак перамяшчэння па вуліцах нашых гарадоў".

Нанач на мотаблоку з прычэпам

“На мотаблоку з прычэпам будзе дазволена ездзіць толькі днём.

У праекце указваецца: "Рух на мотаблоку з прычэпам дазваляецца толькі ў светлы час сутак па ўзбочыне дарогі, устаноўленая хуткасць руху па якой не мусіць перавышаць 90 км/г, а пры адсутнасці ўзбочыны — па праезнай частцы дарогі не далей за 1 метр ад яе правага краю".

З вышэй указаным згаджаюся, але вось калі, напрыклад, грамадзянін, які кіруе мотаблокам з прычэпам, не паспеў вярнуцца з пункту А у пункт Б да надыходу цемры. Што яму тады рабіць? Калі ў яго ўсталяваныя святлоадлюстравальныя элементы або прысутнічаюць ліхтары веласіпеднага тыпу, чаму ён не можа працягнуць рух з надыходам цемры?"

Спрошчаная рэгістрацыя ў ДАІ і перагляд паняцця СПМ

“Нядаўна я набыў электраскутар з такімі параметрамі: магутнасць маторкола — 3 кВт, вага — 105 кг, даўжыня — 2 м. Заводам прадугледжваецца месца для пасажыра, максімальная хуткасць па дакументах абмежаваная да 25 км/г. Ён і купляўся як мапед, але ў рэальнасці скутар упэўнена набірае належныя для мапеда 50 км/г. Калі прыраўняць гэты скутар да СПМ, то становіцца немагчымым яго выкарыстанне, бо пры такіх габарытах і масе вельмі складана манеўраваць на малой хуткасці на ходніках сярод пешаходаў і спешвацца на пераходзе, а калі на пераходзе ёсць бардзюр, то заехаць на яго будзе нерэальна (правяралася). У Мінску нямала пераходаў з высокімі бардзюрамі.

Лічу, што трэба больш дакладна апісаць вызначэнні СПМ і мапедаў, і пры аднясенні да той ці іншай катэгорыі ўлічваць іх магутнасць, вагу, габарыты, мінімальную і максімальную хуткасць (не па дакументах, а менавіта рэальную, або заканадаўча ўсталяваць абмежаванне такой хуткасці). Для мапедаў можна пакінуць хуткасць у 50 км/г у горадзе, і ўвесці забарону на рух з меншай хуткасцю на участках, дзе няма абмежаванняў і перашкод для руху з зададзенай хуткасцю.

Таксама хацелася б мець магчымасць зарэгістраваць электратранспарт у ДАІ паводле спрошчанай працэдуры, з далейшым праходжаннем тэхагляду і аплатай страхоўкі".

Самыя галоўныя — пешаходы

“Калі казаць коратка, то не трэба галоўнымі на дарогах рознага карыстання рабіць аўтамабілі, першыя і галоўныя на мясцовасці — гэта людзі, пешаходы! Потым ідуць веласіпедысты, а затым ужо і аўтамабілісты, пасля іх можам паставіць СПМ, калі так заўгодна. Цалкам няправільна вяртацца назад у гэтым пытанні, нават калі статыстыка пакажа прырост у тысячу працэнтаў — якое можа быць спешванне веласіпедыста?! Наконт СПМ таксама спрэчна, лепш караць, але не пазбаўляць магчымасці, а наконт "велікаў" і пагатоў. Усіх дабротаў!”

А што думаеце вы пра новы законапраект? Падзяліцеся сваімі прапановамі ў каментарах у нашым Telegram-канале.