У мінскім аэрапорце затрымалі замежніка з падробленым пашпартам
На пашпартным кантролі ў мінскім аэрапорце / @gpkgovby / @gpkgovby
У мінскім аэрапорце затрымалі замежнага грамадзяніна з падробленым пашпартам Конга. Мужчына прыляцеў з Турцыі, паказаў памежнікам дакументы. Але памежнікі разгледзелі, што ў пашпарце змененая дата нараджэння, то-бок дакумент быў падроблены.
Па словах мужчыны, пра падробку ён не ведаў. Дакумент атрымаў афіцыйна — у кампетэнтных органах краіны пражывання. Ён таксама расказаў, што ляцеў у Мінск, каб паступіць у адну з беларускіх ВНУ. У выніку яго адправілі ў ІЧУ ГУУС Мінгарвыканкама.
За спробу незаконнага перасячэння мяжы мужчыну пагражае штраф да 100 базавых велічынь і дэпартацыя. Ёсць імавернасць і крымінальнай справы — за выкарыстанне падробленага дакумента. Пакаранне па гэтым артыкуле прадугледжвае абмежаванне волі на тэрмін да двух гадоў.
