Як будзе развівацца сітуацыя на беларускай мяжы і ці можа дайсці да стральбы?
Праблема мігрантаў на мяжы можа стаць не толькі еўрапейскай, але і ўласна беларускай, лічыць кіраўнік Аналітычнага праекта Belarus Security Blog Андрэй Паротнікаў.
“Людзі знаходзяцца ў складанай сітуацыі — і псіхалагічнай, і матэрыяльнай. Сітуацыя ўжо складае праблему, ужо ёсць факты крадзяжоў прадуктаў, ёсць факты, што людзі ходзяць па пад’ездах і просяць паесці. І чым далей сітуацыя будзе зацягвацца, тым больш такіх фактаў мы пабачым”, — кажа Паротнікаў.
Ён кажа, што сітуацыя — выклік для сістэмы грамадскага парадку ў Беларусі. Шмат хто з мігрантаў на захад не трапіць, таму варта падумаць, што з імі рабіць, бо ў Беларусі няма інфраструктуры, каб гэтых людзей размясціць.
“Плана Б няма”, — упэўнены суразмоўца Еўрарадыё.
Ён не выключае, што мы можам пабачыць масавыя спробы прарыву мяжы, у якіх будуць удзельнічаць сотні чалавек. А такія спробы могуць прывесці да стральбы.
“Гэта ж не проста “разабралі плот і пабеглі”. Такую групу немагчыма сабраць за 15 хвілінаў. Схаваць яе — таксама. Адпаведна, з таго боку мяжы людзей у такім выпадку будуць чакаць. І, каб прарвацца, трэба будзе выкарыстоўваць гвалт у адрас сілавікоў. І ў іх тады будзе права на выкарыстанне зброі”, — малюе негатыўны сцэнар Паротнікаў.
