З аптэк Беларусі зніклі экспрэс-тэсты на ВІЧ. Абяцаюць, што часова

Вытворца экспрэс-тэстаў, якія яшчэ нядаўна можна было знайсці ў беларускіх аптэках, — кампанія "Мультытаб". Там пацвердзілі, што цяпер тэстаў няма. Праўда, паабяцалі, што яны зноў з'явяцца ў продажы ўжо ў лютым. Пра прычыны знікнення тэстаў нічога не сказалі.
 

Чаму гэта праблема?

Як растлумачылі ў арганізацыі "Пазітыўны рух", тэставанне важнае для захавання жыцця чалавека і папярэджвання распаўсюджвання інфекцыі.

"У пералік абавязковых тавараў медыцынскага прызначэння, якія павінны быць у аптэках, тэст не ўваходзіць. Адпаведна, аптэкі прымаюць рашэнне самастойна пра заказ тэстаў і, магчыма, зыходзячы з камерцыйнай выгады, попыту", — растлумачылі адну з магчымых прычын перабояў з наяўнасцю тэстаў у арганізацыі.

Цікава, што ў нацыянальнай справаздачы Беларусі за 2018 год адзначалася, што ўкараненне саматэставання насельніцтва пры дапамозе продажу экспрэс-тэстаў было праведзена пры падтрымцы СААЗ і ЮНЭЙДС (Аб'яднаная праграма ААН па ВІЧ/СНІД).