Амерыканскі Бацька: заходнія СМІ знайшлі шмат агульнага між Трампам і Лукашэнкам

04/11/2020 - 12:03

Дональд Трамп і Аляксандр Лукашэнка

Сярод галоўных тэм перад выбарамі прэзідэнта ЗША былі не толькі ўзрост кандыдатаў, іх праграмы і пазіцыі па ключавых пытаннях. Шырока абмяркоўвалася і магчымасць фальсіфікацыі выбараў з боку адміністрацыі дзейнага прэзідэнта Дональда Трампа. А таксама варыянт, што ён папросту адмовіцца прызнаваць сваё паражэнне. Знаёма, так?

Аналогіі знаходзяць і амерыканскія СМІ. Некалькі публіцыстаў у апошнія месяцы параўноўвалі Трампа з Аляксандрам Лукашэнкам і праводзілі паралелі паміж падзеямі ў ЗША і ў Беларусі.

Байдэн у ролі Ціханоўскай?

У рэдакцыйным артыкуле CNN, які выйшаў у канцы верасня, аўтар задаецца пытаннем: што будзе рабіць сусветная супольнасць, калі Трамп адмовіцца прызнаваць вынікі выбараў? У якасці прыкладаў такога развіцця падзей прыводзяцца Беларусь, Венесуэла, Абхазія і Асеція. Цікавая кампанія для ЗША.

У кастрычніку The New York Times выпускае алармісцкую калонку пад назвай "Амерыцы можа спатрэбіцца міжнароднае ўмяшанне". Тут галоўныя паралелі — якраз з Беларуссю.

"[Трамп. — Еўрарадыё] неаднаразова заяўляў, што не прыме вынікі выбараў у выпадку пройгрышу. У такім выпадку Джо Байдэн павінен пераняць прыклад Ціханоўскай і звярнуцца па дапамогу да сусветнай супольнасці", — пісалі ў газеце, прыводзячы ў прыклад выступ Святланы Ціханоўскай у ААН.

Аўтар быў занепакоены і тым, ці змогуць працаваць на ўчастках міжнародныя назіральнікі, каб потым на падставе іх справаздач, у выпадку канфлікту, падаваць скаргу ў ААН.

"Адзіны, хто можа выратаваць краіну"

Паралелі паміж Трампам і Лукашэнкам знаходзілі і аўтары The Business Insider.

"Яго [Лукашэнкі. — Еўрарадыё] асноўная думка: я адзіны, хто можа выратаваць краіну ад цемры і разбурэння. Гучыць знаёма? Нягледзячы на незлічоныя і вельмі значныя рознагалоссі паміж ЗША і Беларуссю, абедзве краіны могуць выпрабаваць на сабе наступствы таго, калі непапулярны лідар застаецца пасля заканчэння тэрміну сваіх паўнамоцтваў".

Агульным у палітыцы Трампа і Лукашэнкі аўтар лічыць не столькі гвалт, колькі "спароджанае дзяржавай абурэнне "іншым".

"Прынамсі, як лідару, апантанаму ідэяй зладзіць грандыёзнае шоу, Трампу варта спадзявацца, што ён не дыскрэдытуе сябе так моцна, як Лукашэнка", — дадаюць у матэрыяле.

"Трамп не зможа стаць паўнавартасным Лукашэнкам"

Паралелі паміж Лукашэнкам і Трампам газета The Washington Post знайшла, аналізуючы рэакцыю (дакладней, яе фактычную адсутнасць) на пратэсты ў Беларусі.

"Мы прыходзім да вельмі няёмкай праўды: апошняе, што хоча рабіць Трамп, — гэта хваліць простых грамадзян, якія мабілізуюцца супраць неліберальнага дэспата праз фальсіфікацыю выбараў. Нават у найлепшыя часы Трампа ён любіў аўтакратаў і не любіў масавыя пратэсты. Ён хваліў Кім Чэн Ына і Уладзіміра Пуціна яшчэ да свайго абрання. Ён таксама пахваліў кіраўніцтва Кітая за рэпрэсіі на плошчы Цяньаньмэнь у 1989 годзе. З моманту свайго абрання прэзідэнтам Трамп неаднаразова дэманстраваў хлуслівае захапленне Пуціным", — тлумачыць маўчанне Трампа пра падзеі ў Беларусі The Washington Post.

Американский Батька: западные СМИ нашли много общего между Трампом и Лукашенко

Трамп выдатна ладзіць з дыктатарамі / Reuters

Выснова, да якой прыходзяць журналісты, таксама цікавая:

"У той частцы мозга, якая ставіць у аснову асноў выжыванне, ён, магчыма, ведае, што апошняе, што павінны бачыць амерыканцы, — гэта мірныя пратэсты, якія вымушаюць дыктатара пакінуць сваю пасаду. Некаторыя паралелі настолькі відавочныя, што нават дзіця можа іх заўважыць".

Яшчэ адна амерыканская газета, The Philadelphia Inquirer, заклікала сваіх чытачоў не сумнявацца "наконт зайздрасці Трампа да аўтакрата".

"Або ў яго гатоўнасці стварыць хаос на выбарах і цалкам сказіць вынікі галасавання. Або ў абыякавасці да расійскага ўмяшання".

Але выснова ў газеце дастаткова лагічная — асабліва ўлічваючы, што ў беларускага лідара досведу ў выбудоўванні вертыкалі ўлады больш на 22 гады:

"Мы не Беларусь, таму Трамп не зможа стаць паўнавартасным Лукашэнкам. Але цяпер і да студзеня тыя, каму неабыякавая дэмакратыя, павінны сцерагчыся спроб Белага дома сфальсіфікаваць выбары 2020 года ў стылі Трампа".