Чаму беларусы ўсё часцей лаюцца ў сацсетках — і як наладзіць зносіны?

А між тым тое, што адбываецца сёння ў краіне і ў свеце, нас вельмі моцна разбурае. Нішто не скончылася. Складаная сітуацыя ў Беларусі, якая пачалася з кавіду ў 2020 годзе, працягваецца дагэтуль. І ў многіх яна абцяжарваецца нейкімі індывідуальнымі складанасцямі — пераезды, крызісы накшталт страты працы або парушаных сацыяльных сувязяў... Усё гэта — вельмі сур'ёзныя прычыны, якія ўплываюць на наш стан.

Мы ўсе вельмі напружаныя. Калі не клапаціцца пра сябе, з часам назапашанай агрэсіі становіцца так шмат, што яе хочацца некуды выліць. Вось людзі і ідуць у сацсеткі. 

Прынцып такі: я не магу супрацьстаяць таму, што адбываецца, не магу выказаць агрэсію адкрыта і неяк паўплываць на сітуацыю, але магу напісаць каментар і ўступіць з кімсьці ў спрэчку. Мне здаецца, гэта асноўнае, што рухае людзьмі.

Гэтая гісторыя вельмі цяжкая. Пасля 2020 года многія сувязі паміж людзьмі былі разарваныя і працягваюць разрывацца. Многія разышліся па каштоўнасцях і пазіцыях, а таксама па адаптацыі да таго, што з намі адбываецца.

Людзі страчваюць людзей — і гэта выклікае вельмі шмат трывогі, бо насамрэч нам вельмі важна быць звязанымі адно з адным.

Нам вельмі важна быць у адносінах, але ў такіх, якія будуць нас падтрымліваць і падсілкоўваць. І чым больш мы страчваем, тым большым робіцца напружанне ўнутры нас і тым складаней нам зноў збліжацца. У выніку ківач адхіляецца ў іншы бок, і мы самі ж працягваем адпрэчваць ці разбураць нашыя сувязі.

Як спраўляцца з назапашаным напружаннем

Калі ў чалавека баліць зуб, ён ідзе да доктара. Але калі ў яго праблемы псіхалагічнага плану, ён можа знайсці тысячу адгаворак, каб не звяртацца да спецыяліста: ад "спраўлюся сам" да "не ва ўсіх жа ёсць на псіхолагаў грошы". 

Чаму так адбываецца і што рабіць?

— Любая праца над сабой выклікае супраціў, — тлумачыць Ганна Матуляк. — Чалавеку можа быць складана нават прайсці нейкі бясплатны курс па выгаранні ці абмеркаваць свае праблемы з сябрамі. Ён разумее, што яму давядзецца сутыкнуцца з нязручнымі перажываннямі, ён не хоча адчуваць боль. Людзі часта выцясняюць свае эмоцыі не таму, што ў іх няма грошай заплаціць псіхолагу, а таму, што ім непрыемна ўсведамляць уласную ўразлівасць. Таму спраўляюцца як умеюць, напрыклад, імкнуцца не звяртаць увагі на свой стан.

Псіхолаг кажа, што такое стаўленне чалавека да ўласнага здароўя часта даводзіць да антыдэпрэсантаў. І добра, калі ён усё ж звяртаецца да спецыяліста, які іх яму выпісвае. У адваротным выпадку ён будзе суткамі выліваць сваё напружанне ў сацсеткі, ад чаго яго стан толькі пагоршыцца.

— На тое, каб схадзіць да псіхатэрапеўта, які выпіша лекі, шмат грошай не трэба. А калі ў вас ёсць страхоўка, грошы могуць наогул не спатрэбіцца, — кажа Ганна Матуляк. — Затое антыдэпрэсанты могуць дапамагчы адрэгуляваць ваш эмацыйны стан.

Мне б не хацелася казаць пра банальныя рэчы — маўляў, шпацыруйце, высыпайцеся, не перагружайце сябе, выконвайце рэжым працы і адпачынку, правільна харчуйцеся. Гэта само сабой. Галоўнае — зразумейце: каб справіцца з эмоцыямі, чалавеку патрэбны чалавек. І нават калі вы з нейкіх прычын не ідзяце да псіхолага або псіхатэрапеўта, памятаеце: любая сувязь, падтрымка і клопат іншага чалавека будуць вельмі важныя.  

Не саромейцеся звяртацца па дапамогу, і хай вас не спыняе тое, што вы можаце кагосьці грузіць сваімі праблемамі. Мы адрозніваемся ад жывёл менавіта тым, што ў нас ёсць камунікацыйная функцыя і зносіны — гэта тое, што нас выцягвае ў цяжкія часы.

Зразумела, што рэсурсы і запасы ва ўсіх розныя, але нават адна размова з сябрам можа даць вам сілы.

Памятаеце, што нават самы моцны чалавек не можа пражыць свае пачуцці без суперажывання і падтрымкі.