Песні сталі злымі, а сабакі навучыліся разумець чалавечую мову — #ІхНоравы

29/03/2024 - 14:36

Замежныя навіны / @rubanau_collage

Тэксты ў песнях сталі занадта простымі і злымі. Пра гэта абвясцілі навукоўцы, якія прааналізавалі больш за 12 тысяч музычных кампазіцый на англійскай мове. Іншыя даследнікі прыйшлі да высновы, што сабакі маюць здольнасць разумець мову, на якой размаўляюць людзі.

Тым часам у Ірландыі адзначаюць 20-я ўгодкі са дня забароны курэння на працы і ў барах, а ў Вільні закрываецца знакамітая рэстарацыя на тэлевізійнай вежы.

Пра тое, ці будзе магчымасць у гасцей горада палюбавацца яго прыгажосцю з вышыні птушынага палёту, і многае іншае чытайце ў традыцыйнай рубрыцы Еўрарадыё “Іх Норавы”.

20 гадоў без цыгарэт

20 гадоў таму ірландскі дзяржаўны службовец Том Паўэр узначаліў альянс, які праявіў наватарскую ініцыятыву ў галіне аховы здароўя. 29 сакавіка 2004 года ў краіне ўвялі першую ў свеце забарону на курэнне ў барах, рэстарацыях і на працоўных месцах.

Тэлевізійныя групы з Японіі, Амерыкі ды іншых краін з'ехаліся ў Дублін, каб зняць рэакцыю грамадзян. Ніхто не ведаў, што адбудзецца. Ці будуць курцы паўставаць? Ці будуць пабы парушаць закон? Няўжо смелы эксперымент пацерпіць крах?

Праз некалькі гадзінаў пасля адкрыцця пабаў журналісты атрымалі адказ. Страйку не адбылося, а правіла замацавалася на ўзроўні закона.

Між іншым, такое рашэнне стала прыкладам для шматлікіх краін свету.

— Том Паўэр быў энцыклапедыяй тытунёвай індустрыі. Ён разумеў кожны крок тытунёвых вытворцаў, — кажа пра свайго калегу экс-міністр аховы здароўя Ірландыі Мішэль Марцін.

Чальцы альянсу, які ініцыяваў забарону, параўноўваюць Паўэра з інжынерам, гідам і шахматным гросмайстрам, які прадбачыў стратэгію суперніка і супрацьстаяў ёй.

Тэксты песень сталі занадта простымі ды злымі

Тэксты песень становяцца больш простымі, злымі і эгацэнтрычнымі. Да такой высновы прыйшлі еўрапейскія навукоўцы, якія прааналізавалі словы ў больш за 12 000 англамоўных песнях розных жанраў з 1980 па 2020 год.

Даследаванне ўмацавала меркаванне раздражнёных пастарэлых меламанаў ва ўсім свеце.

Старэйшая аўтарка даследавання Ева Зангерле звяртае ўвагу на тое, што тэксты песень могуць быць "люстэркам грамадства". Яно адлюстроўвае тое, як з цягам часу змяняюцца нашыя каштоўнасці.

Падчас сваёй работы вучоныя вывучалі эмоцыі, выражаныя ў музычных тэкстах, а таксама тое, колькі розных і складаных слоў было выкарыстана ў іх і як часта яны паўтараліся.

— Ва ўсіх жанрах тэксты мелі тэндэнцыю станавіцца больш простымі і паўтаральнымі, — рэзюмуе Зангерле.

Песні сталі злымі, а сабакі навучыліся разумець чалавечую мову — #ІхНоравы

Віленская тэлевежа / madeinvilnius.lt

Сабакі разумеюць людзей?

Некаторыя гаспадары сабак перакананыя, што іх гадаванцы разумеюць чалавечую мову. Напрыклад, калі папрасіць іх прынесці мяч, яны прыносяць менавіта яго, а не газету ці нешта іншае. Цяпер гэтаму ёсць пацвярджэнне ад венгерскіх вучоных.

Падчас эксперыменту гаспадары сабак прамаўлялі назвы цацак, а затым паказвалі іх і аддавалі гадаванцам, часам наўмысна дапушчаючы памылкі. Напрыклад, называлі мячык — косткай.
Мозг сабак, як паказалі вынікі, па-рознаму рэагаваў на правільныя і няправільныя абазначэнні цацак.

— Мы лічылі, што калі сабака сапраўды разумее значэнне слова, якое абазначае прадмет, то ён будзе чакаць убачыць менавіта гэты прадмет. А калі гаспадар пакажа іншы прадмет, у мозгу сабакі паўстане так званая рэакцыя здзіўлення. І гэта менавіта тое, што мы выявілі, — кажа даследчыцца Мар'яна Бораш.