У Логвінава за год выходзіць 15 мастацкіх твораў, у “Звяздзе” — 29

Кнігарня "Логвінаў" цяпер пад пагрозай. Суд вырашыў, што яе заснавальнік і кнігавыдавец Ігар Логвінаў мусіць выплаціць дзяржаве 1 мільярд рублёў. На столькі ў 2014 тут нагандлявалі.

Кнігарня Логвінава ў лічбах.

За 2014 год тут выдалі 15 кніг (па найменнях). На рускай мове з іх толькі некалькі. І гэта пры тым, што кнігі давялося выдаваць у Вільні, бо ў 2013 годзе Міністэрства інфармацыі пазбавіла Логвінава ліцэнзіі. Яшчэ з ліцэнзіяй, у 2013 годзе кніг выдалі ўдвая болей.

Дзяржаўны выдавецкі дом “Звязда” летась выдаў толькі 29 кніг мастацкай літаратуры, выдавецтва “Мастацкая літаратура” — 44. (Па дадзеных сайта кніжнай палаты. Мастацкая літаратура за выключэннем дзіцячай).

Мінінфарм 6 разоў адмаўляў кнігавыдаўцу ў выдачы ліцэнзіі на гандаль кнігамі. А пасля суд прызначыў Ігару Логвінаву штраф у 5 мільёнаў і выплат на 1 мільярд. Суд палічыў гэты мільярд прыбыткам, хаця па словах кнігавыдаўца, гаворка вядзецца пра абарот кнігарні, а не прыбытак. За гэтыя грошы можна набыць 11 тысяч новых раманаў Віктара Марціновіча ці 2 тысячы кніг “Вялікае княства” Уладзіміра Арлова.

Цяпер выдавец Ігар Логвінаў заклікае неабыякавых сабрацца і дапамагчы кнігарні выплаціць штраф.

“Хутчэй за ўсё, нам давядзецца выплачваць штраф, і мы прымаем гэтыя абавязальніцтвы. Мы звяртаемся да грамадскасці, каб дапамаглі ўратавацца ў такой сітуацыі. Кнігарня стваралася як публічная пляцоўка, гэта культурны праект, паспяховы, як культурны, але не вельмі паспяховы фінансава”.

Ігар Логвінаў

Аўтары пра кнігарню

Віктар Марціновіч у Логвінава выдаваў рускі варыянт рамана “Мова”.

Віктар Марціновіч

“У яго была поўная свабода, як эстэтычная, так і ад умоўнасцяў. Напрыклад, калі перакладаўся на беларускую мову “Сфагнум”, давялося пазбавіцца ад значнай часткі мацюкоў. У Логвінава, гэтага б можна было не рабіць. Бо ён свабодны ад ўмоўнасцяў кнігавыдавец. Закрыццё гэтай кнігарні адчыняе новую старонку ў дачыненні паміж літаратурай і чытачамі. Адзіная ў маім жыцці размова з дзяржаўнымі выдавецтвамі адбылася на кірмашы ў Германіі. Я падышоў да стэнду, прадставіўся, запытаўся, ці зацікаўленыя яны ў супрацоўніцтве. Я тады выстаўляўся на стэндзе Books from Belarus. Яны адразу адказалі, што калі я хачу выдавацца ў дзяржаўных выдавецтвах, то больш нельга звязвацца з апазіцыйнымі стэндамі. Бо каля нашага стэнда яны бачылі Уладзіміра Някляева”.

Антон Кашлікаў надрукаваў у Логвінава раман “Бывшие”.

Антон Кашлікаў

“Мы з 34mag даўно сябруем з гэтай кнігарняй. Калі ў нас узнікла ідэя зрабіць папяровыя кнігі, пытанняў не ўзнікла. З імі было прасцей за ўсё гэта рабіць. Бо выдавецкае поле ў Беларусі настолькі малое, зачышчанае, што ў нас не было выбару: да каго яшчэ ісці. 4 кнігі, якія мы разам выдалі — гэта добры паказчык. Тое, як іх атакуюць — сапраўдная беларуская гісторыя. Бо культура ў нас параўноўваецца з ідэалагічнай зброяй”.

9 студзеня закончыўся працэс у эканамічным судзе над Ігарам Логвінавым — уладальнікам кнігарні "логвінаЎ". Яго вінавацілі ў продажы кніг без ліцэнзіі Мінінфармацыі. Суд прызначыў Логвінаву штраф у 5 мільёнаў рублёў. Акрамя таго, з Логвінава спаганяюць 961 мільён рублёў, які падатковая інспекцыя палічыла прыбыткам крамы.

Фота: tut.by, lit-bel.org, vitebsk4.me