Барбі прыйшла ў Саудаўскую Аравію, а Трамп — у суд. Зноў! #ІхНоравы

15/08/2023 - 15:34

"Іх норавы" / калаж Еўрарадыё

Аляксандр Лукашэнка даручыў свайму прэм'еру знайсці спосаб наладзіць адносіны з Польшчай. Праз некалькі дзён у прапагандысцкіх тэлеграм-каналах апублікавалі фота вагнераўскага шаўрона на фоне памежнага слупа Літвы.

Большага дзівацтва свет сёння не бачыў. А што бачыў? Коратка раскажам у рэгулярным аглядзе міжнародных навін.

Мала паказаць “Барбі”, каб стаць лібералам

Справы "Барбі" на Блізкім Усходзе кепскія — яе забаранілі ў Кувейце і яшчэ ў шэрагу краін. І тут фільм нечакана стрэліў у... Саудаўскай Аравіі! Гэта нічога не кажа пра мастацкую каштоўнасць "Барбі". Але шмат што кажа пра зменлівы палітычны ландшафт у каралеўстве, лічыць New York Times.

Восем гадоў таму ў Саудаўскай Аравіі не было кінатэатраў — не тое што фільмаў пра патрыярхат. Жанчынам забаранялі кіраваць транспартам, а вуліцы патрулявала паліцыя, якая сачыла за тым, каб жанчыны былі апранутыя ў чорнае з ног да галавы.

А потым да ўлады прыйшоў прынц Махамед ібн Салман. Ён скасаваў многія з гэтых абмежаванняў — але пры гэтым узмацніў палітычныя рэпрэсіі, адправіў у турму адразу і кансерватыўных святароў, і левых актывістаў, і сваіх крытыкаў-бізнесменаў, і нават членаў уласнай каралеўскай сям'і. Так-так, гэта той самы прынц, якога лічаць замяшаным у жорсткае забойства журналіста Джамаля Хашогі — памятаеце гэтую жудасную гісторыю?

Цяпер саудаўскія жанчыны могуць працаваць і нават лётаць у космас. І могуць паглядзець "Барбі" ў кінатэатры!

Саудаўскія жанчыны зрабілі ружовы манікюр, саудаўскія мужчыны надзелі ружовыя кашулі — і пайшлі ў кіно.

Але не ўсім у каралеўстве фільм спадабаўся — і гаворка зусім не пра кансерватараў. Адной з тых, хто заклікаў не паказваць яго, была прадпрымальніца Вафа Альрушайд. Яна лічыць, што мэсідж "Барбі" скажае фемінізм.

“Я ліберальны чалавек і заклікала да свабоды 30 гадоў. Таму гаворка не ідзе пра тое, што [крытыкуючы Барбі] я прытрымліваюся звычаяў і традыцыі", — кажа яна ў інтэрв'ю the New York Times. Вафа лічыць, што фільм залішне віктымізуе жанчын і ачарняе мужчын.

Затое, здаецца, прынц Салман з дапамогай фільма зноў паказаў сябе высакародным "лібералам". Праўда, іронію бачаць нават кувейтцы, якім па "Барбі" даводзіцца ехаць у Эр-Рыяд. Яны кажуць, што са свабодай выказвання там ужо відавочна лепей, чым у Саудаўскай Аравіі, хоць "Барбі" ў іх і не паказваюць.

Свет стаміўся ад Афганістана — і жыццё там ператварылася ў пекла

Афганка Захра ўспамінае сваё жыццё да лета 2021 года. Яна была студэнткай, у яе было шмат сяброў. Дзяўчына хацела вывучыцца на дызайнера і адкрыць свой бізнес.

"Мы былі шчаслівыя. Мы вучыліся, часам збіраліся разам... каталіся на роварах", — кажа Захра.

З прыходам да ўлады талібаў Захра больш не ездзіць на ровары. Яна не можа працягваць вучыцца, выходзіць на вуліцу з адкрытым тварам, не можа ўбачыць сяброў — тыя ўцяклі з краіны. Яна кажа, што ўсё, што можа рабіць, — сядзець дома і баяцца за будучыню.

Роўна два гады таму "Талібан" прыйшоў да ўлады ў Афганістане. Тады талібы спрабавалі запэўніць сусветную супольнасць, што яны змяніліся. І што жанчыны за імі змогуць працягваць нармальнае жыццё.

Прайшло два гады — і жанчын літаральна сцерлі з грамадскага жыцця, піша CNN.

Сітуацыя можа толькі пагоршыцца, папярэджваюць актывісты. Свет стаміўся ад шматгадовых войнаў у Афганістане і адварочваецца ад яго. А скарачэнне замежнай дапамогі азначае, што мільёны афганцаў застаюцца сам-насам з засухай, голадам і хваробамі.

Калі тыя, хто не ўдзельнічае ў вайне, стамляюцца ад яе, пачынаецца самае страшнае.

А нешта вечнае

Здаецца, гэтыя навіны пра суды над Трампам ніколі не скончацца — як навіны пра бой паміж Цукербергам і Маскам.

Але так, цяпер і пракуратура штата Джорджыя выставіла абвінавачанні Дональду Трампу і яшчэ 18 асобам. Іх будуць абвінавачваць у спробах "адмяніць" паразу Трампа на выбарах 2020 года ў гэтым канкрэтным штаце. Па адным з абвінавачанняў Трампу можа пагражаць да 20 гадоў пазбаўлення волі, піша ВВС.

У асноўным справа грунтуецца на ўцечцы тэлефоннай размовы Трампа. Ён прайграў у штаце Джо Байдэну і тэлефанаваў высокапастаўленаму чыноўніку з выбарчай камісіі Джорджыі з даволі двухсэнсоўнай просьбай "знайсці 11 780 галасоў".

"Усё, чаго я хачу, — знайсці 11 780 галасоў, якія ў нас дакладна ёсць. Таму што мы перамаглі ў гэтым штаце. Жыхары Джорджыі абураныя, як і людзі па ўсёй краіне", — патрабуе Трамп у гэтай тэлефоннай размове.

Адвакаты Трампа раней казалі, што пракурорам наўрад ці ўдасца даказаць, што ён наўмысна хацеў перапісаць вынікі выбараў. Абаронцы сцвярджаюць, што Трамп сапраўды верыў у сваю перамогу — адсюль і ягоныя заявы.

Гэта чацвёртая крымінальная справа супраць Трампа. Яму ўжо выстаўленыя абвінавачанні ў сувязі з умяшаннем у выбары 2020 года, выплаце грошай за маўчанне і няправільным захоўванні сакрэтных дакументаў.

Трамп працягвае называць усе абвінавачанні на свой адрас "паляваннем на ведзьмаў" і сцвярджае, што ўсе яны палітычна матываваныя.

"Чаму яны не выставілі абвінавачанні 2,5 года таму? Таму што яны хацелі зрабіць гэта проста ў разгар маёй палітычнай кампаніі", — заяўляе Трамп у сваёй сацсетцы "Праўда".

Як бы мы ні ставіліся да Трампа, беларусам сапраўды мусіць быць непрыемна глядзець, як спрабуюць засудзіць аднаго з самых папулярных кандыдатаў у прэзідэнты. У нас на гэта свае прычыны. Не варта спяшацца ні вінаваціць, ні апраўдваць Трампа. У адрозненне ад Беларусі, у ЗША яшчэ ёсць суд, які можа ва ўсім разабрацца.

Капілімпійскія гульні

Вы таксама стаміліся ад навін пра тое, ці пусцяць беларусаў на Алімпіяду? Тады ў нас для вас алімпійская навіна, якая дакладна не выкліча раздражнення.

У японскіх заапарках прайшлі Капілімпійскія гульні. Капібары ў пяці заапарках краіны на хуткасць елі кавун! Пераможца справіўся са сваёй порцыяй за 1 хвіліну і 29 секунд.

Проста пакінем вас сам-насам з гэтым відэа. Не дзякуйце.

Заліпайце

Памахайце рукой

Даглядзелі? А цяпер ідзіце і павітайцеся з суседзямі. Апытанне Gallop сярод амерыканцаў паказала, што гэта павышае адчуванне дабрабыту. Людзі, якія вітаюцца з шасцю суседзямі на дзень, адчуваюць сябе лепш, чым тыя, хто прабягае па лесвічнай клетцы, не адрываючы галавы ад смартфона.

"Не трэба нават, каб вы добра ведалі чалавека, спыняліся і балбаталі з ім, не трэба нават ведаць яго імя!" — падбадзёрваюць аўтары даследавання. Зрэшты, чым часцей вы будзеце махаць суседзям рукой, тым вышэйшыя шанцы, што рана ці позна вы яшчэ і пазнаёміцеся.

Ёсць і невідавочныя бонусы такіх прывітанняў. Будзеце прыязнейшыя да суседзяў — станеце больш шпацыраваць па раёне, пройдзеце больш крокаў і умацуеце фізічнае самаадчуванне.

Дарэчы, аказалася, што амерыканцы, маладзейшыя за трыццаць, вітаюцца з суседзямі ледзь не ўдвая радзей, чым пажылыя людзі. Часткова таму, што часцей жывуць у перапоўненых мегаполісах. Часткова — ну, так, бо смартфоны.

Так што дачытвайце — і памахаеце каму-небудзь рукой. Думаем, за межамі ЗША гэтае правіла таксама працуе.