Беларусы не заўважылі, што заробак вырас

Паводле дадзеных Белстата, сярэдні заробак за ліпень па краіне пабольшаў ажно на 300 000 рублёў да 5,4 мільёна рублёў, ці на 5,6%.

А вось у гасцінічным бізнесе заробак вырас ажно на паўмільёна — да 4 мільёнаў. Тэлефаную ў "Прэзідэнт-гатэль" — дзе-дзе, а там заробкі павінны быць нават большымі за сярэднія па краіне.

“Чатыры налічваюць, на рукі тры мільёны. Ёсць начныя змены. Вы праўда хочаце быць пакаёўкай? Гэта ж генеральная прыборка і  штодзень!” — адгаворваюць мяне ўладкоўвацца пакаёўкай. Мо гатэль і 5-зоркавы, але заробак у 330 долараў да статусу не дацягвае.  

Даярка і настаўніца з 20-гадовым стажам атрымліваюць прыкладна аднолькава — 4 мільёны.

Настаўніца гісторыі з Магілёўскай вобласці гаворыць з Еўрарадыё пра заробак толькі ананімна. Кажа, што грошай у кашальку асабліва не пабольшала — 3,6 мільёна. Заробак настаўніцы недацягвае нават да сярэдняга па краіне. 

"Канечне, не задавальняе заробак. Але мо ў вас у Мінску заробкі трохі большыя.  Калі я працую 21 гадзіну, атрымаю 3,6 мільёна, але я працую, удзельнічаю ў канферэнцыях, грамадскім жыцці, мы адказваем за дзяцей, займаем іх да паўдня. А што за заробак у маладых спецыялістаў! Не дзіва, што не затрымліваюцца".

Настаўніца нават не можа прадказаць, калі на заробак пасля ўсіх выдаткаў на камуналку, на падрыхтоўку да школы зможа купіць пральную машыну — яе даўно пара мяняць.

Пытаюся, ці згодна настаўніца з тым, што іх заробак, як і заробак калгаснікаў, амаль аднолькавы. Але тут жанчына ліберальная.

"Яны таксама працуюць, калі іх не будзе, нам не будзе чаго купляць. Колькі настаўнікі павінны зарабляць на стаўку? Мо мільёнаў пяць, а астатняе — справа кожнага, хто колькі заробіць", — разважае настаўніца. 

Весялей за ўсё раслі заробкі ў лётчыкаў — у іх заробак вырас з 9,6 да 11,4 мільёна, а таксама фінансістаў — з 8,2 мільёна да 8,7 мільёна рублёў.

Дарэчы, лідарства па самых нізкіх сярэдніх заробках за першыя паўгода — каля 3,3 мільёна — па краіне ўтрымліваюць Браслаўскі (Віцебская вобласць) і Краснапольскі (Магілёўская вобласць) раёны. У лік лідараў па самых высокіх заробках уваходзяць Салігорскі раён — 7,3 мільёна, і Мінск — 6,3 мільёна.