Курыя Мінска-Магілёўскай дыяцэзіі: падаткі на Чырвоны касцёл несправядлівыя

21/07/2020 - 09:06

Курыя Мінска-Магілёўскай архідыяцэзіі выступіла з заявай наконт запазычанасці парафіі святога Сымона і святой Алены ў Мінску.

Як распавядала Еўрарадыё, пасля рэстаўрацыі Чырвонага касцёла ў яго раптам выявілася запазычанасць амаль у 160 тысяч рублёў. Гэта выдаткі на амартызацыю, зямельны падатак і г.д.

У сваёй заяве курыя нагадвае, што касцёл быў пабудаваны ў 1910 годзе, у 1932-м яго зачынілі. Спярша ў будынку быў Дзяржаўны польскі тэатр БССР, потым — Дом кіно.

"У 1990 годзе будынак касцёла быў перададзены католікам у бязвыплатнае карыстанне без перадачы яго ва ўласнасць парафіі, што мы лічым несправядлівым рашэннем, бо ён быў пабудаваны католікамі і павінен ім па праве належаць", — падкрэсліваюць у курыі.

Каталіцкі клір пералічвае, што зрабілі вернікі для аднаўлення будынка касцёла і парафіяльнага дома:

"выканана ўнутранае пераабсталяванне касцёла са зносам міжпаверхавых перакрыццяў, унутраных сценаў і перагародак і аднаўленнем яго перашапачатковага выгляду;
здзейснена замена даху касцёла і парафіяльнага дома металадахоўкай;
адлітыя і ўсталяваныя на вежах і іншых элементах касцёла 9 бронзавых і 2 жалезныя крыжы;
нанава пабудаваныя падвальныя памяшканні з канферэнц-залай, класамі для катэхізацыі дзяцей і бібліятэкай;
выканана пакрыццё падлогі залы для набажэнстваў, галерэі, падвальных памяшканняў з граніту і мармуру агульнай плошчай 1000 кв.м;
зроблены 5 алтароў з ружовага мармуру;
спраектаваны і адліты з бронзы цэнтральныя ўваходныя дзверы;
заменены вокны апсіды (трохпавярховай прыбудовы да будынка касцёла);
усталяваны ўваходныя бакавыя дзверы ў будынак касцёла;
адрэстаўраваны вітражы будынка касцёла, галерэі і галоўнай вежы;
двойчы выканана добраўпарадкаванне асфальтавым пакрыццём прылеглай тэрыторыі вакол комплексу будынкаў плошчаю больш за 700 кв.м;
узведзена гранітная падпорная сценка па перыметры тэрыторыі комплексу будынкаў, а таксама парадныя сходы з чырвонага граніту да цэнтральнага ўваходу ў будынак касцёла з боку плошчы Незалежнасці;
у 1996 г. перад касцёлам была ўсталявана скульптура Арханёла Міхала, а ў 2000 годзе — помнік "Звон Нагасакі".

Акрамя набажэнстваў, у Чырвоным касцёле адбываюцца культурныя мерапрыемствы, у тым ліку вельмі папулярныя канцэрты духоўнай музыкі.

У 2013 годзе паводле распараджэння кіраўніка дзяржавы комплекс Чырвонага касцёла быў перададзены з рэспубліканскай уласнасці ў камунальную ўласнасць Мінска і ў бязвыплатнае карыстанне парафіі. Мінгарвыканкам перадаў яго ў гаcпадарчае кіраванне КУП "Мінская спадчына".

Курыя падкрэслівае, што за ўвесь час карыстання парафія спраўна аплочвала камунальныя паслугі, электраэнергію, а таксама работы па бягучым рамонце.

"Аднак пасля праведзенай у 2018-2019 гадах рэканструкцыі комплексу Чырвонага касцёла ў першым квартале 2020 года парафія атрымала дакументы, у якіх указана, што, згодна з заключанымі дагаворамі бязвыплатнага карыстання, дадаткова звыш камунальных плацяжоў штомесячная сума выплат рэлігійнай супольнасці на карысць КУП "Мінская спадчына" складае 12 950,39 рубля як кампенсаванне за зямельны падатак, амартызацыю і падатак на нерухомасць", — адзначаюць католікі. Такім чынам назапасілася запазычанасць больш за 160 тыс. рублёў. Пры гэтым запазычанасці па камунальных плацяжах няма.

Атрымліваецца, што парафія страціла права на падатковыя льготы па выплаце зямельнага падатку і падатку на нерухомасць. Паводле закону, участкі, адведзеныя пад культавыя будынкі, не абкладаюцца зямельным падаткам і падаткам на нерухомасць. Чырвоны касцёл як такая ўстанова згаданы ў пастанове Саўміна №1194 ад 22 снежня 2012 года.

Аднак цяпер будынкі комплексу Чырвонага касцёла належаць камунальнаму будаўніча-эксплуатацыйнаму прадпрыемству "Мінская спадчына" на праве гаспадарчага кіравання.

Католікі паведамляюць, што неаднаразова звярталіся да дзяржаўных уладаў з просьбай перадаць Чырвоны касцёл парафіі, але кожны раз натыкаліся на адмову. "Апошні раз такую просьбу парафія накіравала ў Мінгарвыканкам у маі 2020 года. У адказе ад 18 чэрвеня 2020 г. адзначана, што ў цяперашні час Мінгарвыканкам не бачыць падставаў для перадачы будынка касцёла і парафіяльнага дома ва ўласнасць рэлігійнай супольнасці", — дзеляцца яны падрабязнасцямі.

Плаціць штомесячныя падаткі на нерухомасць ды інш. у 12 950,39 рубля, выстаўленыя "Мінскай спадчынай", вернікі не могуць. "Для парафіі яны непад’ёмныя, а таксама несправядлівыя", — лічаць католікі

Яны выказваюць удзячнасць дзяржаве за рэканструкцыю касцёла. Але нагадваюць, што 30 гадоў рамнтам касцёльнага комплексу займаліся самі вернікі. Дый цяпер яны сваім коштам набылі тры дарагія бронзавыя званы, усталяваныя на вежы касцёла.

Сітуацыю з выплатай амартызацыі католікі апісваюць так: "Атрымліваецца так, што дзяржава, не пытаючыся ў парафіі, як быццам пазычыла ёй і цяпер патрабуе вяртання. Але пра гэта не было гаворкі перад пачаткам рэстаўрацыі".

Таму каталіцкая курыя лічыць неабходным, каб дзяржава перадала касцёл вернікам: "Мы заклікаем дзяржаўныя ўлады перагледзець сваё рашэнне, перадаць комплекс будынкаў Чырвонага касцёла парафіі і тым самым аднавіць права карыстання падаткавымі ільготамі ў адпаведнасці з заканадаўствам".

Каб сачыць за галоўнымі навінамі, падпішыцеся на канал Еўрарадыё ў Telegram.

Мы штодня публікуем відэа пра жыццё ў Беларусі на Youtube-канале. Падпісацца можна тут.