За выкананне кавераў, караоке ды рэпост фільма давядзецца заплаціць 10 мілёнаў

Як паўплываюць змены ў Кодэксе пра адміністратыўныя правапарушэнні ў сферы аўтарскага права на беларусаў. З 4 красавіка распаўсюджанне чужых песень ці кліпаў у сацыяльных сетках, аматарскія відэа з канцэртаў, пампаванне фільмаў і іншыя падобныя рэчы з’яўляюцца парушэннем аўтарскага права. Але прыцягнуць да адказнасці за такія дзеянні Аддзел па барацьбе з эканамічнымі злачынствамі можа толькі, калі будзе заява ад праваўладальніка ці калектыўнага ўпраўляючага ў асобе Нацыянальнага цэнтра інтэлектуальнай уласнасці.

“Фізічная асоба, якая капіюе для сябе экземпляр, напрыклад, аўдыёвізуальнага твору (фільма) не парушае аўтарскіх правоў, — кажа кіраўнік цэнтра па калектыўным упраўленні НЦІУ Аляксей Бічурын. — Але парушае закон, калі прадастаўляе доступ да гэтай копіі іншым асобам. Напрыклад, калі расшарвае папку з гэтым фільмам, што па-сутнасці і робяць торэнт-трэкеры”.

Такая ж сітуацыя і з выступам кавер-бэндаў ці выкананнем песень у караоке.

Напрыклад, калі на выступ кавер-бэнда ўваход па квітках, то музыкі мусяць выплаціць Цэнтру інтэлектуальнай уласнасці 5% ад сумы продажу. Калі без квіткоў, то ўсё залежыць ад колькасці наведвальнікаў. Да 500 чалавек — 5 базавых велічыняў (105 000 рублёў), але не меней за 7% ад сумы ўзнагароды выканаўцаў за канцэрт. Але гэта ў выпадку, калі музыкі самі арганізуюць свой выступ. Калі ж канцэрт ладзіцца па запрашэнні, напрыклад, клуба, то гэтыя абавязальніцтвы кладуцца на адміністрацыю пляцоўкі. Аляксей Бічурын дадае, што сталічныя бары з кавер-гуртамі заключаюць такія дамовы рэгулярна.

Поўны спіс тарыфаў аўтарскага ўзнагароджання, які збірае НЦІУ у межах калектыўнага ўпраўлення правамі на музычныя творы.

“А калі таму ж кавер-бэнду вельмі хочацца стварыць уласную аранжыроўку на нейкую песню, то адзінай парадай будзе — звярнуцца непасрэдна да праваўладальніка, — працягвае Аляксей Бічурын. — Без згоды праваўладальніка любыя дзеянні з творам будуць адназначна расцэньвацца, як парушэнне аўтарскіх правоў”.

З замежнымі ж аўтарамі ўсё складаней. Бо калі ў іх няма прадстаўнікоў у Беларусі, то і заявіць пра парушэнне не будзе каму. Але лепш не рызыкаваць, пераконвае супрацоўнік НЦІУ.

Спіс арганізацый па калектыўным упраўленні, з якім НЦІУ усталяваў адносіны ўзаемнага прадстаўніцтва інтарэсаў.

“Для рэгулярных рэйдаў з праверкамі ў нас папросту няма падставаў, бо няма заявы аўтара, — кажа намесніка кіраўніка першага аддзела галоўнага ўпраўлення па барацьбе з эканамічнымі злачынствамі МУС Аляксандр Пагорскі. — Але, калі наш беларускі выканаўца пойдзе, напрыклад, у караоке-клуб, ці на канцэрт кавер-бэнда і пачуе там сваю песню, то ён можа напісаць заяву. Вось тады прыцягнем да адказнасці кіраўніцтва караоке-клуба. Пры гэтым, натуральна, мусім зафіксаваць, што факт парушэння адбыўся, апытаць сведак”.

Прадстаўнікі НЦІУ наведваюць канцэрты і адсочваюць парушэнні аўтарскіх правоў. Аляксей Бічурын пераконвае, што штрафуюць рэгулярна, проста “відаць, музыкі не вельмі папулярныя, таму гэтыя справы засталіся без розгаласу”. Такая ж сітуацыя і з ліцэнзаваным камп’ютарным праграмным забеспячэннем. Першы штраф за карыстанне неліцэнзійнай версіяй Windows атрымала група кампаній “Родная сторона” вясной мінулага года.

Спіс аўтараў і іншых уладальнікаў аўтарскага права, якія перадалі свае правы ў калектыўнае ўпраўленне НЦІУ.

Штрафы за парушэнне аўтарскіх правоў ідуць у бюджэт краіны. Але, калі факт парушэння будзе пацверджаны, праваўладальнік можа асобна падаць у суд і атрымаць кампенсацыю, якую палічыць патрэбнай.

Незаконнае распаўсюджанне ці іншае незаконнае выкарыстанне аб'ектаў аўтарскага права, сумежных правоў ці аб'ектаў права прамысловай уласнасці а таксама гатункаў раслін ці тапалогіі інтэгральнай мікрасхемы караюцца накладаннем штрафу ў памеры ад 20 да 50 базавых велічынь (4,2-10,5 мільёнаў беларускіх рублёў), для індывідуальнага прадпрымальніка — да 100 базавых велічынь (да 21 мільёна), а для юрыдычнай асобы — да 300 базавых велічынь (да 63 мільёнаў).