Іх норавы: Яўген Малалетка выйграў World Press Photo, Ілан Маск адабраў птушачак

Перад доўгімі выходнымі ў Беларусі быў насычаны інфармацыйны тыдзень — усе як быццам спяшаліся дарабіць розныя справы, стварыць інфанагоды і правесці мерапрыемствы, каб з чыстым сумленнем пайсці перадыхнуць. У свеце таксама адбывалася шмат чаго цікавага. Мы кожны тыдзень збіраем навіны, якія трапілі на старонкі сусветных СМІ, але засталіся незаўважанымі ў Беларусі. Пачытайце, каб было што абмеркаваць сёння ўвечары ў бары з сябрамі. 

Няма часу чытаць? Слухайце нас на любой зручнай платформе.

Галоўным здымкам года прызналі фатаграфію цяжарнай украінкі, якую выносяць з разбомбленай радзільні ў Марыупалі

Украінскі фатограф Яўген Малалетка атрымаў галоўную фотажурналісцкую прэмію — World Press Photo. Малалетка стаў пераможцам у намінацыі "Фатаграфія года". Ён сфатаграфаваў параненую Ірыну Калініну, калі яе выносілі з марыупальскай радзільні, якую расійскія ваенныя абстралялі падчас аблогі горада. Дзіця Ірыны нарадзілася мёртвым, а яна памерла пасля родаў.

Яўген Малалетка і яго калега відэажурналіст Мсціслаў Чарноў працавалі ў абложаным Марыупалі. Гэты здымак Малалетка зрабіў для Associated Press.

9 сакавіка 2022 года расійскае войска абстраляла радзільнае аддзяленне марыупальскай лякарні №3. Паводле афіцыйных украінскіх звестак, тры чалавекі загінулі, 17 атрымалі раненні. 
 

А ў іншым конкурсе фотаздымкаў Sony World Photography Awards перамог малюнак нейрасеткі. Аўтар адмовіўся ад узнагароды і раскрытыкаваў суддзяў

Журы вядомага конкурсу Sony World Photography Awards у адкрытай катэгорыі Creative абрала пераможцам "фатаграфію" ў стылі чорна-белых здымкаў 1940-х з назвай "Pseudomnesia: the Electricia" ("Псеўдамнезія: электрыка"), што апынулася малюнкам нейрасеткі, які зрабіў нямецкі мастак Борыс Эльдагсен.

"Дзякуй, што выбралі маю выяву і прынялі гістарычнае рашэнне — гэта першая выява, створаная ШІ, якая перамагла ў прэстыжным міжнародным конкурсе ФАТАГРАФІІ. Колькі з вас ведалі ці падазравалі, што гэта была праца ШІ? Нешта з гэтым не тое, праўда? Выява нейрасеткі і фатаграфія не павінны канкураваць адна з адной у такім конкурсе. Гэта проста розныя сутнасці.

Я як нахабная малпа падаў заяўку на конкурс, каб праверыць, ці гатовы ён да выяваў нейрасетак. Не гатовы. Свет фатаграфіі патрабуе абмеркавання. Абмеркавання, што можна назваць фатаграфіяй, а што не. Дах фотамастацтва досыць шырокі, каб змясціць выявы нейрасетак, — альбо гэтак мы зробім памылку? Адмаўляючыся ад узнагароды я хачу паскорыць працэс абмеркавання", —  напісаў на сваім сайце ў звароце мастак.

Пасля публікацыі паведамлення прэс-служба конкурсу выпусціла заяву са сцвярджэннем, што ведае пра сапраўднае паходжанне «здымка» і не прысуджала яму перамогу. На што Эльдагсен паказаў лісты, у якіх арганізатары паведамляюць яму пра перамогу. Аўтар ужо постфактум расказаў, як яму давялося правіць здымак каля 40 разоў з дапамогай розных інструментаў наладжвання працы штучнага інтэлекту, і распаліў дыскусію тым, як далёка можа зайсці ШІ і ці павінны мы дазваляць яму быць часткай нашага жыцця. Пакуль жа катэгорыя Creative застаецца без пераможцы.
 

Тое, што было ў Android першапачаткова, стане хутка даступна ў iOS. Apple дазволіць усталяванне старонніх праграм 

Інсайдэры заяўляюць, што ў найбліжэйшым буйным абнаўленні аперацыйнай сістэмы для айфонаў можна будзе спампоўваць праграмы з іншых онлайн-крам, а не толькі з App Store. Такім чынам, Apple пачне выконваць новыя патрабаванні Еўрапарламента — App Store пазбавіцца манаполіі.

Нядаўна ўведзеныя палажэнні закона ЕС аб лічбавых рынках (DMA), які пачаў дзейнічаць 1 лістапада 2022 года, патрабуюць, каб Apple і Google давалі карыстальнікам доступ да старонніх крам з праграмамі, дазваляючы распрацоўнікам абыйсці 15% і 30% камісіі крам App Store і Play Store. Apple спрабавала аспрэчыць закон, сцвярджаючы, што ўсталяванне праграм з ненадзейных крыніц павялічыць рызыку махлярства, шкодных праграм і іншых праблем для карыстальнікаў.

Аднак Еўрасаюз не прыняў гэты аргумент кампаніі. Як менавіта будзе працаваць доступ да пабочных крам з праграмамі, пакуль невядома, але мяркуецца, што кампаніі раскрыюць усе падрабязнасці на чэрвеньскай прэзентацыі.

Таксама на прэзентацыі ў чэрвені Apple прадставіць новыя MacBook, аперацыйную сістэму xrOS і сваю першую гарнітуру змяшанай рэальнасці.
 

Сінія птушачкі больш не ў модзе, Twitter забраў маркіроўку ў "правераных карыстальнікаў"

Twitter пачаў выдаляць сінія птушачкі верыфікацыі ў карыстальнікаў, якія не падпісаліся на платную паслугу Twitter Blue. Гэта прывяло да таго, што птушачкі зніклі з акаўнтаў вядомых асоб, такіх як Папа Рымскі, экс-прэзідэнт ЗША Дональд Трамп, заснавальнік Microsoft Біл Гейтс, мадэль Кім Кардаш'ян і спявачка Беёнсе. Журналісты заходніх медыя выказваюць асцярогу, што гэта можа прывесці да з'яўлення большай колькасці фэйкавых акаўнтаў, якія будуць спрабаваць маскіравацца пад старонкі славутасцяў.

Некаторыя ўрадавыя ўстановы таксама страцілі свае сінія птушачкі, і цяпер у іх ёсць толькі шэрыя, якія Twitter выдае для дзяржаўных акаўнтаў. У той жа час кіраўнік Twitter Ілан Маск падарыў верыфікацыю тром вядомым асобам: пісьменніку Стывену Кінгу, баскетбалісту Леброну Джэймсу і акцёру Уільяму Шэтнеру.

My Twitter account says I’ve subscribed to Twitter Blue. I haven’t.
My Twitter account says I’ve given a phone number. I haven’t.

— Stephen King (@StephenKing) April 20, 2023

Па статыстыцы, цяпер толькі 1% карыстальнікаў Twitter фактычна падпісаны на сэрвіс Twitter Blue, які дае права на атрыманне сіняй птушачкі верыфікацыі. Пры гэтым памер штомесячнай аўдыторыі сацыяльнай сеткі перавышае 500 млн чалавек, паводле ацэнак самога Маска.

Уладальнік Twitter паведаміў, што рэкламадаўцы гатовыя вяртацца на старонкі сацыяльнай сеткі з рэкламнымі бюджэтамі, але на самой справе Ілан Маск імкнецца павялічыць даходы ад падпісак, каб зрабіць платформу палітычна незалежнай.
 

І зноў пра нейрасеткі: нямецкі часопіс апублікаваў падробленае інтэрв'ю з Шумахерам, якое згенераваў ШІ

Сям'я легендарнага аўтагоншчыка Міхаэля Шумахера мае намер падаць у суд на нямецкі часопіс Die Aktuelle за публікацыю падробленага інтэрв'ю са спартсменам. Як паведамляе інфармагенцтва Associated Press, сваякі сяміразовага пераможцы "Формулы-1" былі абураныя тым, што выданне апублікавала згенераванае штучным інтэлектам інтэрв'ю пад выглядам рэальнага. У загалоўку артыкула было пазначана, што гэта першае інтэрв'ю Шумахера пасля аварыі.

У інтэрв'ю сцвярджалася, што жыццё Шумахера змянілася пасля траўмы, атрыманай на гарналыжным схіле ў 2013 годзе. Паводле аўтараў артыкула, пасля трагедыі жыццё ўсіх блізкіх спартсмена стала жудасным. Аднак унутры інтэрв'ю тлумачылася, што цытаты Шумахера на самай справе не з'яўляюцца яго словамі, а былі створаныя з дапамогай штучнага інтэлекту. Аднак, на думку сям'і гоншчыка, матэрыял быў неэтычны і ўводзіў чытачоў у зман.

Міхаэль Шумахер атрымаў сур'ёзную чэрапна-мазгавую траўму 29 снежня 2013 года падчас адпачынку ў гарах. Ён выехаў за межы трасы і зваліўся, стукнуўшыся галавой аб выступ скалы. Шлем Шумахера расшчапіўся, а сам ён неўзабаве ўвайшоў у кому.