Іх норавы: мядзведзь у басейне, Айван і Хэйлі ў Рыме і пацяпленне — усюды

У адной краіне заняліся пераасэнсаваннем каланіялізму — і не ў той, пра якую вы падумалі. А ў іншай мядзведзі панадзіліся хадзіць у госці да чалавека, есці яго ежу і гуляць з яго катамі — і зноў не ў той. 
 

Выраслі, зразумелі

Кароль Нідэрландаў Вілем-Аляксандр папрасіў выбачэння за датычнасць краіны да рабства, піша CNN. Гэтыя выбачэнні пацярпелым народам ён прынёс падчас цырымоніі, прысвечанай 160-годдзю адмены рабства ў Нідэрландах.

"У гэты дзень, калі мы згадваем галандскую гісторыю рабства, я прашу выбачэння за гэтае злачынства супраць чалавецтва", — сказаў кароль, стоячы ля помніка рабству ў Амстэрдаме.

І прызнаў: не ўсе галандцы падзяляюць яго пачуцці і будуць салідарныя з гэтай прамовай. Таму што расізм у грамадстве ўсё яшчэ застаецца праблемай. Зрэшты, тысячы гледачоў, якія слухалі яго прамову, сустрэлі яе апладысментамі.

Нідэрланды цяпер пераглядаюць сваё каланіяльнае мінулае. Напрыклад, калі кароль быў у Інданэзіі, ён папрасіў выбачэння за "празмерны гвалт" падчас галандскага каланіяльнага праўлення там. А нядаўна прэм'ер-міністр Марк Рутэ прызнаў, што яго краіна нясе адказнасць за гандаль рабамі — таму што атрымлівала ад яго выгаду.

А яшчэ Нідэрланды вернуць Інданезіі і Шры-Ланцы сотні каштоўных артэфактаў, вывезеных у часы каланіялізму, расказвае ВВС.

"Мы ўпершыню вяртаем прадметы, якія не мусілі апынуцца ў Нідэрландах", — сказаў міністр культуры краіны.

І галандцы не першыя ў Еўропе, хто просіць выбачэння за каланіялізм. Брытанія і Германія таксама пачалі вяртаць культурныя артэфакты туды, адкуль іх забіралі.

Увогуле, калі надзея на людзей знікае, можна спадзявацца на будучыя пакаленні. Вырастуць, зразумеюць, пераасэнсуюць. 

І яшчэ крыху пра важнасць пераасэнсавання

Турыст, які надрапаў на сцяне Калізея памятнае "Айван + Хэйлі 23" таксама пераасэнсаваў свае паводзіны.

Вы ўжо ў Threads? І мы таксама! Падпішамся?

Візіт прыязнасці

Адгадайце, пра якую краіну размова: мядзведзіца з медзведзянятамі шосты год запар наведваецца да жыхароў аднаго і таго ж горада. Вось жа і не адгадалі — гэта гісторыя з амерыканскага штата Канэктыкут.

Некаторыя мясцовыя жыхары кажуць, што іх суседзі баяцца мядзведзіцу менш, чым было б трэба. А іншыя адказваюць, што лічаць яе часткай супольнасці, расказвае Mirror.

"Ва ўсіх нас розныя стасункі з гэтай мядзведзіцай. Яна прыходзіць да мяне ў гараж па ежу, а ў суседзяў проста сядзіць на ганку з іх катом", — кажа адзін мясцовы жыхар.

"Яна купалася ў маім басейне", — выхваляецца другі.

Калі вашыя адносіны з суседзямі не нагадваюць гэтыя — што ж, можа, вам проста трэба завесці басейн.