Мясакамбінаты: Беларускія пакупнікі не прывыклі да натуральнай каўбасы!

Мінчанка публічна скардзіцца, што не можа знайсці каўбасы без узмацняльніка смаку глутамата натрыю E621 – рэчыва, якое па звестках некаторых навукоўцаў, можа выклікаць прывыканне да ежы і, як следства, атлусценне і праблемы з сардэчна-сасудзістай сістэмай.

Перабіраю каўбасу ў гандлёвым цэнтры – амаль ва ўсёй цэлы спіс харчовых дадаткаў. Які з іх шкодны, а які не вельмі?

На быхаўскім мясакамбінаце “Мясаград” падкрэсліваюць – амаль ўся прадукцыя цяпер з гэтымі “Е”.

“Не сказаць, каб абсалютна шкодныя, але і не сказаць, каб вельмі карысныя! “Е” гэта ёсць “Е”, — кажуць на мясакамбінаце. Але заўважаюць, што згодна з дзяржстандартамі на выраб прадукцыі – глутамат натрыю нармуецца.

У Магілёўскім тэхналагічным універсітэце нават прыводзяць дакладную норму на кіло сыравіны.

“Для найбольшага дасягнення смакавага эфекту трэба 1-3 грамы рэчыва на кілаграм сыравіны. Ён (глутамат натрыю – заўвага Еўрарадыё) даўно выкарыстоўваецца, мы ж і самі яго дадаём у гэтых прыправах – “магі” ён ёсць”, — прыгадваюць выкладчыкі Магілёўскага тэхналагічнага ўніверсітэта.

Атрымліваецца, да 1-3 грамаў глутамата натрыю на кілаграм каўбасы!

Той жа быхаўскі “Мясаград” амаль год назад запусціў цэлую лінейку прадукцыі без кансервантаў. Але ў аддзеле маркетынгу нечакана чую, што натуральная прадукцыя не карыстаецца попытам!

“Мо таму, што прадукцыя без “Е” — прадукцыя не зусім нашага кліента, нашага насельніцтва? Трэба людзей падводзіць да гэтага, што гэта правільна, гэта карысна. Тая ж натуральная касметыка – выглядае непрэзентабельна і пахне дрэнна, але яна натуральная! Тут гэтак жа. На від натуральная каўбаса не такая ружовая, зрэз не вельмі прыгожы. У Еўропе да гэтага ўжо прыйшлі, нават ў Расіі. А у нас, на жаль, пакуль не”.

На Барысаўскім мясакамбінаце гісторыі з мінчанкай трохі здзіўляюцца – лінейкі прадукцыі без дадаткаў маюць амаль ўсё мясакамбінаты. Пагаджаюцца, што іх не так і шмат, але тут жа рэкламуюць сваю прадукцыю без дадаткаў.

“У нас ёсць гатунак “Доктарскай” экстра, максімальна прыбліжаная да дзяржстандартаў, без усялякіх дабавак, без нічога, але я сумняваюся, што гэта жанчына яе купіць. Гэта, скажам так, дарагі сегмент”, — кажуць на Барысаўскім мясакамбінаце. Вырабляць каўбасу без дадаткаў даражэй, бо выкарыстоўваюцца натуральныя прыправы.

У Барысаве нават прыводзяць лічбы: калі кошт звычайнай варанай каўбасы – 45 тысяч рублёў, дык без дадаткаў будзе на 10 тысяч даражэй. І тут здзіўляюся я, бо каўбаса натуральная даражэй на долар – гэта не так і многа. Але ў Барысаўскім камбінаце іншае меркаванне – пакупнік галасуе рублём і языком.

“Але іх (натуральныя каўбасы – заўвага Еўрарадыё) не купляюць! А я вам скажу, я рабіла эксперымент да сваёй дэгустацыі. Рабіла каўбасу з адной і той жа сыравінай, але ў адну паклала ўзмацняльнік смаку, у другую не. І што б вы думалі? Высокія ацэнкі атрымала каўбаса з ўзмацняльнікамі! Наш народ проста прывык да гэтага”, — прыводзяць ў Барысаве.