Па чутках — будзе гандлёвы цэнтр. Што студэнты БІП ведаюць пра закрыццё ўстановы

19/06/2024 - 11:10

Філіял БІП у Гродне / vgr.by

"Студэнты былі агаломшаныя і разгубленыя. Мы спадзяваліся, што ўніверсітэт зможа знайсці выхад і працягнуць сваю дзейнасць, але на афіцыйным сайце з'явілася паведамленне пра яго закрыццё", — кажа Еўрарадыё Дзяніс, студэнт БІП — Універсітэта права і сацыяльна-інфармацыйных тэхналогій, які абвясціў аб закрыцці.

Для студэнтаў навіна стала чыстай неспадзяванкай. Зрэшты, перадумовы для яе былі: чуткі пра тое, што найстарэйшая прыватная ВНУ краіны, створаная ў 1990 годзе, не прайшла акрэдытацыю, хадзілі ўжо даўно. Ды і імкненне ўладаў цалкам падмяць пад сябе і кантраляваць сферу адукацыі не было для іх сакрэтам.

Еўрарадыё распытала біпаўцаў, як яны ўспрынялі закрыццё альма-матэр і што збіраюцца рабіць далей. Адказы публікуюцца са змененымі імёнамі студэнтаў.

Прыкладна такі ж самы, як усе астатнія

На думку Дзяніса, якасць выкладання ў БІП прыкладна такая самая, як і ў большасці дзяржаўных ВНУ, кшталту БДУ або БНТУ.

"У краіне сістэма адукацыі ўніфікаваная міністэрствам, яно звычайна складае планы на год і колькасць гадзін на кожную дысцыпліну. На мой погляд, якасць адукацыі ў БІП была прыкладна такой жа самай, як і ва ўсіх універсітэтах у краіне, якія адпрацавалі вялікую колькасць часу.

У сярэднім нараканняў на навучанне не было, ва ўніверсітэта быў добры выкладчыцкі склад".

Што стала прычынай закрыцця БІП — пакуль незразумела. Вядома толькі, што рашэнне прынялі заснавальнік і кіраўніцтва універсітэта. Пра вынікі акрэдытацыі (як і пра тое, ці праходзіла яна наогул) не паведамляецца.

Універсітэт будзе працаваць да канца жніўня. Потым усіх студэнтаў абяцаюць перавесці ў іншыя беларускія ўніверсітэты.

Неўзабаве пасля абвяшчэння аб спыненні працы адміністрацыя БІП паведаміла і пра тое, што інтэрнат будзе вымушаны рассяліць усіх студэнтаў.

"Я заўсёды думаў, што ў яго [ВНУ. — Еўрарадыё] вялікія планы на будучыню. Універсітэт распрацоўваў планы новых дысцыплін, хацеў павялічваць лектарскі фонд, пашыраць колькасць памяшканняў, нішто не паказвала на тое, што заснавальнік і кіраўніцтва універсітэта будуць яго закрываць.

[У мяне] планы цмяныя — трэба чакаць, пакуль універсітэт збярэ ўсю інфармацыю, усе студэнты здадуць экзамены і аплацяць даўгі па навучанні".

Але чаму універсітэт закрыўся? Суразмоўца мяркуе, што ўсяму віной прэтэнзіі з боку арганізацый, якія правяралі яго дзейнасць.

"Ва ўніверсітэта былі невялікія парушэнні, звязаныя з неадпаведнасцю стандартам памяшканняў, у якіх праводзіліся лекцыі. Тым не менш на працягу 30 гадоў гэтыя памяшканні лічыліся прымальнымі для адукацыйнага працэсу. Аднак у 2024 годзе ліцэнзію нечакана адклікалі".

У канцы Дзяніс дадае, што сітуацыя, якая склалася, стала шокам для ўсіх.

"Усё гэта здаецца дзіўным, асабліва ўлічваючы планы ўніверсітэта па пашырэнні. БІП заўсёды імкнуўся да развіцця, нягледзячы на дробныя парушэнні, якія былі непазбежныя ва ўмовах дынамічнага адукацыйнага наваколля".

"Ёсць тры варыянты для пераводу: БДЭУ, БДУ і МІПСА"

Студэнтка БІП Юлія лічыць, што ў іх быў "цудоўны універ з шыкоўнымі выкладчыкамі".

"Вучыцца вельмі падабалася, выкладчыкі многія даволі строгія і патрабавальныя, але справядлівыя. Некаторыя з БДУ, некаторыя дзейныя адвакаты. Быў яшчэ былы суддзя Канстытуцыйнага суда, навукоўцы таксама.

Вучыцца было нялёгка — шмат заданняў, пісалі некалькі рэспубліканскіх зрэзаў, па іх былі вельмі добрыя вынікі. У тых, хто рэальна вучыцца — высокія [ацэнкі], у тых, хто не надта — сярэднія, нізкіх наогул не было".

Пра закрыццё дзяўчына даведалася 14 чэрвеня, за некалькі дзён да афіцыйнага абвяшчэння.

“Гэта ўжо была афіцыйная інфармацыя — стараста групы ў размове напісала. Да гэтага ў красавіку-траўні хадзілі чуткі, што універ можа закрыцца. Нам намеснік дэкана сказаў, што проста на гэты год не будзе новага набору, а мы якраз давучымся. Мабыць, так і планавалі, але нешта пайшло не так.

Рэакцыя [на закрыццё] у мяне была вельмі эмацыйная, я праплакала некалькі гадзін. Вельмі люблю свой універ, ён ужо стаў зусім родным, цяпер таксама тужліва".

Юля чакае інфармацыі пра тое, у якую ВНУ яе перавядуць.

"Ёсць тры варыянты: БДЭУ, БДУ і МІПСА. Пераводзіць будуць як мінімум групамі, магчыма і патокам, але гэта пакуль яшчэ дакладна невядома. Гэта вырашае Міністэрства адукацыі. Калі нас адправяць у БДЭУ або БДУ, застануся там".

Калі прапануюць давучвацца ў МІПСА, то дзяўчына, хутчэй за ўсё, будзе пераводзіцца — вучыцца там яна зусім не хоча.

"Мы не прайшлі праверку"

Алена — студэнтка 3 курса юрыдычнага факультэта. І паколькі ёй застаўся апошні год навучання ў БІП, яна разглядае перавод у іншыя ВНУ Мінска ці іншага горада: "Не збіраюся здавацца і буду пераводзіцца для далейшага атрымання адукацыі".

Навучанне ў БІПе дзяўчыне падабалася. Яна лічыць яго ўзровень дастатковым, каб пасля прымяняць веды на практыцы.

"Выкладчыкі з вопытам работы — ужо ведалі, як зацікавіць сваёй дысцыплінай, падавалі матэрыял даступнай мовай. Пра закрыццё ВНУ я даведалася ад адміністрацыі ўніверсітэта [яшчэ] да выхаду інфармацыйнага ліста на сайце. Здзівілася і ўзрушылася, але чакала ўсё ж афіцыйнага паведамлення. І вось, у панядзелак выйшла ўжо тое самае паведамленне пра закрыццё", — шкадуе Алена.

Па словах дзяўчыны, прычынай закрыцця ВНУ былі праверкі з боку ўладаў.

"Інфармацыя непацверджаная, але ўсе ведаюць, што ў кожную ўстанову адукацыі прыходзяць праверкі з Міністэрства адукацыі. [Мы] не прайшлі праверку, коратка кажучы".

Быў універсітэт — будзе гандлёвы цэнтр

Цікавым меркаваннем з нагоды закрыцця БІПа падзялілася студэнтка Ірына. Паводле інфармацыі дзяўчыны, будынак ВНУ плануюць неўзабаве знесці. А на яго месцы разгорнецца будоўля.

"Нам пра гэта сказалі ўчора. Дакладнай інфармацыі ў мяне няма, але нібыта наш універсітэт выкупляюць кітайцы. [Пра гэта] нам сказалі старэйшыя курсы, так што я не ўпэўненая, што гэта праўда. Нібыта гандлёвы цэнтр будуць будаваць", — падсумавала размову дзяўчына.

БІП знаходзіўся ў самым цэнтры Мінска, на вуліцы Караля. Гэты ўчастак зямлі і праўда прывабнае месца для бізнесу.